CEBU, Philippines — Moabot 11 ka mga panimalay ang naapektahan sa sunog nga niulbo sa San Antonio Street, Barangay Hipodromo ning Dakbayan sa Sugbo, Sabado sa gabii.
Ang sunog naglambigit ug residential houses nga giingong nagsugod sa panimalay ni Abelita Sanchez.
Ang sunog nadawat sa kabomberohan alas 10:37 ug hingpit nga napawong alas 11:23 na ug nagbilin kini og gibanabanang P1.8 milyon nga danyos.
Walay gikataho nga nakalas o naangol atol sa pag-ulbo sa maong sunog. Lima ang partial nga nakan-an ug unom ang hingpit nga naugdaw.
Moabot 13 ka pamilya o 33 ka individual ang apektado sa maong sunog.
Ang kabomberohan nga gipangulohan ni FO1 Pedie Canillas, ang Investigator padayon nga nihimo pa karon sa ilang imbestigasyon may kalabutan sa pag-ulbo sa sunog. Sa talaan sa Department of Social Welfare and Services kinsa nagpadayon pa sa ilang intake sa mga fire victims adunay 14 ka pamilya ang apektado o 47 ka individuals. Sa kinatibuk-an adunay walo ka panimalay ang nasunog.
Ang mga nasunogan anaa karon sa Hipodromo Gym ug gitagaan na kini sila og pack lunch sa kagamhanan. (BANAT NEWS)