CEBU, Philippines — Usa ka lalaking nanulis nga nakuhaan og video sa CCTV ug nag-viral sa social media diha sa F. Pacaña Street, Barangay Tisa, siyudad sa Sugbo kagahapon sa alas 3 sa kaadlawon nadakpan dayun kay wala mag-ilis sa iyang gisul-ob.
Makita sa video nga ang biktima samtang naglingkod ug nagduwa sa iyahang cellphone kalit nga niabot ang suspek nga naka helmet, naka sleeveless og color blue ug yellow, naka dirty white nga shorts, naka tsinelas ug diretsong nition sa gidala niini nga armas ug pugsanong gikuha ang cellphone sa biktima. Wala'y nahimo ang biktima kun dili ang paghatag sa iyahang cellphone ug mitalikod dayun tungod sa kabalaka nga basin pusilon kini sa suspek.
Nakaabot sa atensyon sa Labangon Police Station 10 ang maong hitabo ug bisan nagpaabot pa sila sa reklmante nga moadto sa police station nihimo dayon sila imbestigasyon.
Dunay concerned citizens nga nihatag og mga ngalan sa kapulisan kay nakamay-ong sa pamayhon ug barog sa tulisan bisan pa og wala makita ang nawong niini diha sa footage.
Sa pagpahigayon og follow up operation sa Labangon Police Station 10 nakadawat pg tawag mga pasado alas-4 sa hapon nga adunay armed person sa Sitio San Pedro, Barangay Tisa.
Gialarmahan kini sa kapulisan sa Labangon Police Station pinagulohan ni Police Major Eraño Regidor ug nadakpan nila ang armadong tawo ug nakuhaan og kalibre .45 nga armas.
Ang suspect mao si Jessie Cañete, 26 anyos, nagpuyo sa Sitio Lawis, Riverside, Barangay Pasil, siyudad sa Sugbo. Sa dugang pagsusi sa iyang lawas nakuhaan kini og duha bulto nga drugas nga nagkantidad og P68,000.
Nagkanayon si Regidor nabantayan dayun nila nga ang gisul-ob sa suspek parehas sa lalaking nanulis sa dalan F. Pacaña nianang kaadlawon.
Gumikan kay daling nikatap ang balita niadto ang tag-iya sa CCTV ug mikompirmar nga ang nadakpan sa kapulisan mao ang tulisang diha sa ilang duol. Ang biktima mipatim-aw sab ug positibo siyang giila nga maoy nitulis kaniya.
"Na confirm pud niya nga ang maong nadakpan nga suspetsado mao puy nagtulis pud niya," sigon ni Regidor.
Matud ni Regidor nga giangkon sa suspek ang pagpanulis gumikan matud pa kini sa kalisod. Aduna say mga dugang impormasyon nga nakuha ang kapolisan nga mga nalambigit sab sa mga krimen gikan sa maong tulisan.
Mitug-an matud pa ang suspek nga dili momenus 20 na ka pagpanulis ang iyang nahimo dili lang dinhi sa Cebu City apan apil na sa Talisay City.
"Ang kaning mga biktima nato usahay, tulison bitaw, dili nalang magpa blotter kay hasulan moadto og estasyon ilabi na cellphone ra puy gipang igo sa atong na record," asoy ni Regidor.
Giingong grupo ni sila diin duha ka motor ang dad-on sa ilang pagpanulis.
Giawhag ni Regidor ang mga biktima sa pagpanulis sa nanglabay nga mga adlaw sa pagduol sa ilang buhatan aron matan-aw kun mao ba kini ang mibiktima kanila ug aron mapun-an pa ang mga kasong ipasaka batok sa suspect.
Kasong pagpanulis, paghupot og illegal nga armas ug illegal nga drugas ang ipasaka batok sa suspect. (BANAT NEWS)