CEBU, Philippines — Moabot sa P3.5 billion ang revenue o kita sa Probinsya sa Sugbo gikan bulan sa Enero hangtod Hunyo karong tuiga.
Ang maong kita mas dako itandi sa P3.2 billion nga nakolekta sa susamang period sa niaging tuig base sa comparative analysis sa revenue sa Kapitolyo gikan sa Provincial Treasurer.
Kini naggikan sa nagkadaiyang tinubdan sama sa local tax revenue diin sakop niini ang amusement tax, franchise tax, professional tax, property transfer tax, real property tax ug uban pa diin moabot kini sa P484.7 million.
Apil usab ang non-tax receipts sama sa regulatory fees, business and service income, rent income ug uban pa nga nakatampo sa kita sa Kapitolyo.
Nalakip usab ang kita sa parking, museo Sugbo, operasyon sa nitrogen plant tourism, waterwork system ug miscellaneous income.
Ang total nga non-tax revenue miabot sa P112 million, mas dako gikan sa P60.2 million sa susamang panahon sa niaging tuig sulod sa unom (6) ka bulan. Ang pagsaka moabot sa 87.12% sumala sa Treasurer’s Office.
Apil sa gikuhaan og kita sa Kapitolyo mao ang “external sources” niini sama sa gahin sa Internal Revenue Allotment (IRA) nga moabot sa P2.6 billion, GOCCs, gahin sa ubang national tax collections, capital investment receipts ug uban pa.
Ang mga bus terminal sama sa Cebu South Bus Terminal ug Cebu North Bus Terminal nga parehong “income-generating” nga pasilidad miabot sa P58.8 million ang kita gikan Enero hangtud Hunyo karong tuiga.
Ang mga district hospital nakatampo usab og P172.6 million sa maong period. Kini tanan sakop sa General Fund sa Kapitolyo way labot ang Special Education Fund (SEF) nga moabot sa P328 million. (BANAT NEWS)