CEBU, Philippines — Mokabat sa 49 ka paresan ang misalmot sa kasalan sa Barangay Basak San Nicolas nga gihimo sulod sa Archdiocesan Shrine of St. Arnold Janssen.
Gipangulohan ang santos nga misa ni Fr. Roger Bag-ao, SVD ang Provincial Superior sa Society of the Divine Word uban sa mga kaparian. Suma pa ni Kapitan Norman Navarro ang mga gikasal mao kadtong nagpuyo na sulod sa lima ka tuig pataas. Si Navarro nitug-an nga magpadayon ang ilang kasalan sa barangay basta daghan pa ang magpuyo-puyo kay siya nagtuo nga bililhon kaayo ang kasal ug aduna kini dakong grasya gikan sa Ginoo.
Si Fr. Bag-ao sa iyang bahin mapasalamaton sa Ginoo sa grasya sa sacramento sa kasal ug sa mga nagpaluyo sa malampuson nga kalihukan.
Si Bag-ao nipahinumdum nga wala man gayuy perpekto apan iyang giawhag ang bag-ong mga magtiayon nga himoong sentro sa ilang relasyon ang Ginoo. (BANAT NEWS)