Tulo ka babaye nakalas

CEBU, Philippines — Tulo ka mga babaye ang nakabsan sa ilang mga kinabuhi kagahapong adlawa sa managlahing dapit dinhi sa Sugbu.

Napalgang patay ang usa ka 18 anyos nga babayeng tinun-an sa sulod sa usa ka lodge sa Barangay Poblacion ss Dakbayan sa Toledo kagahapong adlawa, Septiyembre 20, 2024.

Ang maong babaye nga napalgan sa usa ka roomboy  sa lodge nga gibaatan og panyo ang baba ug wala na maglihok.

Sumala pa ni Lt. Col. Manolo Salvatierra, hepe sa Toledo Police Office nga usa kini ka Grade 12 nga tinun-an sa usa tunghaan sa lungsod sa Balamban.

Matud pa ni Salvatierra nga base sa report sa staff sa lodge, ni check in kini kuyog ang usa ka hamtong nga lalaki niadtong alas 3:00 sa hapon niadtong Huwebes, Septiyembre 19 apan oras na unta sa tinggawas sa gi-abangan nga lawak, wala pa kini mogawas hinungdan nga pasado alas 8:30 sa buntag, gituktok na nila kini ug pugsanong giablihan kay walay nitubag.

Apan nakugang nalang sila nga mao kadto ang ilang naabtan ang tinun-an nga gibaatan ang baba ug gituohan nila dayong wala nay kinabuhi ang babaye.  Wala sab mabantayi kun unsang orasa migawas ang kauban niining lalaki. Ang kabanay sa biktima matud pa sa kapolisan maoy miila sa patay nga lawas.

Matud pa nga nananghid kini niadtong Huwebes sa udto nga magpraktis sa tunghaan apan wala na kini mouli  nianang gabii hinungdan nga napugos ang kabanay niini nga mag-post sa social media nga na-missing kini.

Padayon nga giila sa kapulisan kun kinsa ang kauban sa tinun-an diha sa maong lodge. Nakakuha na sab sila sa mga CCTV footages gikan sa duol nga mga establisemento sa maong lodge.

Abogada

Samtang patay ang usa ka 33-anyos nga matud pa Certified Public Accountant nga abogada sab  human kini giingong natagak gikan sa ika-16 nga andana sa usa ka building diha sa Cebu Business Park, Barangay Luz, Dakbayan sa Sugbo kagahapon sa alas 2:30 sa hapon.  Gikataho nga usa ka abogada ang maong natagak kinsa residente sa Dakbayan sa Lapu-Lapu.  Si Police Major Romeo Caacoy, Jr., hepe sa Mabolo Police Station nagkanayon nga susihon pa nila ang hinungdan sa maong insidente. "Padayon atong imbestigasyon kong unsa gyud ang hinungdan ug rason nganong nahulog to siya, so ato pa gyud gisusi ang tanang anggulo," padayag ni Caacoy.

Nilutaw sa dagat

Sa laing insidente, usa sab ka patay'ng lawas sa usa ka wala pa mailhing babaye ang napalgang nilutaw sa kadagatan sa Sitio Noah, Barangay Calajoan, Lungsod sa Minglanilla kagahapon sa buntag, Septiyembre 20, 2025, Biyernes. Sa pagkutlo ning maong balita ang babaye gibana-banang nag-edad og 50 anyos, short blonde hair, nagsul-ob og color violet nga spaghetti, pula nga shorts ug color sky blue nga classic clog slippers.

Sa report sa Minglanilla Police Station, alas 6:15 sa buntag kagahapon nadiskubrehan ang patay'ng lawas sa babaye sa mga mananagat nga sila si Joseph Parajes, 40, ug Ernesto Espara, 77.  Matud pa Parajes maoy unang nakabantay sa lawas nga naglutawlutaw duol sa iyang sakayan maong dali dali siyang nibugsay paduol kang Espra kinsa adtong tungora naa ra duol sa usa ka barko nga color yellow.

Gipahibawo niya kini bahin sa nakita niyang patay'ng tawo. Nanawag dayon og tabang si Espra sa Bantay Dagat sa Barangay Calajoan ug gidala ang patay'ng lawas sa baybayon. Ni-apply pa og first aid ang Minglanilla Responders apan wala nay kinabuhi ang babaye.

Gidala ang patay'ng lawas sa Minglanilla District Hospital ug gideklarar kining dead-on-arrival.   Padayon ang imbestigasyon sa kapulisan sa pag-ila niini ug nganong naabot kini sa maong lugar ug kun unsa gyuy nahitabo kaniya. — report ni Decemay P. Padilla/IBM BANAT NEWS