CEBU, Philippines — Gi-ransak og dili momenus lima ka tawo ang usa ka balay ug miangol sa duha ka tagbalay niini diha sa Sitio Laguna, Barangay Bulacao, siyudad sa Sugbo kagahapon sa kaadlawon, Biyernes, Septiyembre 20, 2024.
Ang mga naangol mao sila si Jonathan Cabanes, 28 anyos ug maguwang niini nga si Juncil Cabanes, 33 anyos nga parehong gikataho nga gidunggab.
Ang inahan sa duha nga si Leonora miingon nga nakamata siya tungod sa paglagubo sa ilahang pultahan. Gumikan sa kahadlok wala nila kini ablihi bisan sige og ingon ang mga lalaki sa gawas nga 'ablihi'.
Nisaka siya sa ilang taas ug gipukaw iyang anak nga si Juncil , apan giingong nakasulod gyud ang mga lalaki ug gisampungan ang baba ni Leonora ug gitabunan og tuwalya ang nawong niini.
Nasugatan sab matud pa si Juncil sa mga lalaki ug diretso kining gidunggab. Nisaka sila sa kwarto ni Jonathan ug gidunggab sab kini.
Giingong nawagtangan og kwarta nga P15,000 ang inahan nga gituohang gikuha sa mga lalaki.
Si Police Major Jeciree Basitao, hepe sa Inayawan Police Station 7 sa Cebu City Police Office (CCPO) ang duha ka mga biktima nakaangkon og samad-dinunggaban sa dughan. Giingong naamong lang ang maguwang sa manghod kinsa maoy nalambigit sa ilegal nga drugas.
Nasayran sab nga makadaghang higayon na gisuwayan pagatake si Jonathan apan tungod sa CCTV sa ilang balay wala mopadayon ang mga mamumuno.
Apan karon nga gitangtang na ang CCTV human ang usa sa ilang igsuong naginstalar niini nibalhin na og puyo, nakahigayon gyud ang mga gikatahapan. - IBM BANAT NEWS