P33.5M kantidad sa drugas nasakmit sa CPPO

CEBU, Philippines — Nikabat ngadto sa P33.5 milyones ang balor sa ilegal nga drugas ang nasakmit sa kapolisan sa Cebu Police Provincial Office (CPPO) sulod sa usa ka semana nila nga anti-criminality operations nga gasugod sa Septiyembre 9 hangtud sa 15, 2024.

Nasayran nga resulta kini sa ilang 60 ka operasyon batok sa ilegal nga drugas diin nakasakmit sila og 4,938.02 gramo nga shabu ug 78 ka indibidwal ang nadakpan.

Samtang niabot sa 40 ka operasyon ang napahigayon sa CPPO batok sa loose firearms ug walo ka tawo ang nasikop, siyam ka armas ang nakompiska ug 31 ka armas ang gi-surrender.

Sa illegal gambling, ang CPPO nakapahigayon og 28 ka operasyon diin 38 ka tawo ang nadakpan ug dul-an sa P5,000 nga kwarta nga pusta ang nasakmit.

Niabot sa 37 ka operasyon batok sa wanted person ang gipahigayon sa CPPO ug 35 ka tawo ang nasikop.  Sa maong gidaghanon lima ang most wanted persons ug 36 ang other wanted persons.

Sa laing bahin, 34 ka tawo ang nasikop atol sa gipahigayon nga usa ka adlaw nga Simultaneous Anti-Criminality Law Enforcement Operation kon SACLEO sa kapolisan sa Central Visayas.

Niabot sa 31 ka operations ang gipahigayon batok sa ilegal nga drugas diin 139.51gramo nga ginadiling drugas nga nibalor og dul-an sa P1 milyon ang nasakmit.

Nasikop ang 25 ka tawo kinsa 19  niini most wanted persons ug unom ang other wanted              persons.

Dul-an sa P5 mil ang nasakmit nga pusta atol sa 41 ka operasyon nga gihimo batok sa illegal gambling diin 45 ka tawo ang nadakpan.

Duha ang gitahan og nasakmit nga loose firearms samtang P607mil ang multa nga nakolekta sa 829 ka tawo nga nakalapas sa mga lokal nga ordinansa.

Sa laing bahin usab, lima ka kawatan ang nadakpan sa kapolisan sa Dakbayan sa Talisay sa managlahing lugar.

Una niini, usa ka biktima nga nagpa-carwash ang nidangop sa kapolisan human ang iyang kwarta nga P45 mil nga gisulod sa bag ang gidagan sa upat ka lalaki diha sa Barangay Dumlog sa niaging adlaw.

Sa gihimo nga follow-up operation sa kapolisan nadakpan ang mga suspetsado diin usa kanila menor de edad apan P22,400 na lang ang kwarta nga na-recover.

Usa ka lalaki ang nasikop human nanguha og mga baligya sa tindahan nga walay bayad-bayad.

Ang mga suspetsado nabalhog sa prisohan ug gikatakdang pasakaan og kaso sa nahimo nilang kalapasan. — Rowena D. Capistrano, Gabriel C. Bonjoc (BANAT NEWS)