CEBU, Philippines — Temporaryong gipahunong sa Office of the Building Official kon OBO ang trabaho sa edipisyo diin natagak ang usa ka lalaking pintor gikan sa ika-17 nga andana sa building.
Matud pa ni Architect Florante Catalan, ang pangulo sa OBO, una na nilang gi-serve ang notice of violation sa edipisyo ug gisunod usab dayon ang temporary suspension sa building 2 sa hotel diin natagak ang pintor nga nisangpot sa kamatayon niini.
Sa nasayran niadtong Lunes, Septiyembre 16, 2024, patay na nga nakit-an sa usa ka manhole ang lawas sa 30-anyos nga pintor nga si Michael Isidro, residente sa Barangay Tanke, dakbayan sa Talisay human kini natagak gikan sa ika-17 nga andana sa gitrabahoang edipisyo diha sa barangay Apas, siyudad sa Sugbo.
Dugang pa ni Catalan, gitutokan sa ilang pagsubay karon ang structural integrity sa proyekto diin base sa ilang initial nga assessment compliant man o nakatuman sa lagda sa katukoran sa building.
Base sa pakighinabi sa OBO sa developer ug sa kontraktor, nga aksidente lang ang nahitabo, ug nagsul-ob og harness ang pintor samtang kini nagtrabaho apan ang gikaw-itan niini nga grill sa aircon ang posibleng nalangkat hinungdan sa pagkatagak nga mideretso sa manhole nga naa sa ubos.
Gidugang ni Catalan, andam ang kontraktor nga motabang sa pamilya sa namatay nga pintor.
Samtang mopahigayon og occupational safety and health investigation ang Department of Labor and Employment (DOLE) Region 7 karong adlawa subay sa maong insidente.
Si Luchel Taniza, DOLE-7 information officer, mitug-an nga mopadala og mga labor inspectors ang ilang buhatan aron e-verify ang mga impormasyon nga ilang nadawat.
Gipadayon pa usab ang imbestigasyon sa kapolisan aron masuta kun nagpasagad ba ang kompaniya nga gitrabahoan bahin sa safety measures. (BANAT NEWS)