Pagpatuman sa housing project sa Mandaue gitun-an sa NAPC

CEBU, Philippines — Gihimong modelo sa mga opisyales sa National Anti-Poverty Commission (NAPC) ang housing project sa kagamhanan sa siyudad sa Mandaue nga Tipolo Residences sa barangay Tipolo.

Atol sa ilang pagbisita sa buhatan ni acting Mayor Glenn Bercede ilang gihimo ang benchmarking niini ug gitun-an ang mga pamaagi sa Mandaue City sa pagpatuman sa housing project.

Nakita sa National Anti-Poverty Commission ang kamalampuson sa pagkatukod sa Tipolo Residences nga naghatag og paglaum sa mga informal settlers nga makaangkon og desente nga pinuy-anan.

Kauban sa acting mayor nga niabi-abi sa mga bisita nga mga opisyal sa NAPC si Housing and Urban Development Office (HUDO) Officer-in-Charge Karlo Cabahug ug Executive Secretary Atty. Miguel Lumapas.

Sa nasayran ang Tipolo Residences napuy-an na karon sa 700 ka mga benepisaryo sa maong proyekto nga mga biktima sa sunog sa Mandaue. 

Si Bercede miingon nga si suspended mayor Jonas Cortes nagtinguha pa sa pagtukod og dugang nga mga susamang proyekto diha sa Mandaue nga gihangop usab sa mga magpapatigayon sa dakbayan. (BANAT NEWS)