OSCA nanawagan nga ma-exempted sa VAT ang mga seniors

CEBU, Philippines — Gi-awhag ang mga botika, kan-anan ug uban pa nga service providers sa siyudad nga mohatag og 20% nga diskwento sa mga senior citizen base sa presyo sa palaliton ug serbiyo sa dili pa idugang ang Value Added Tax (VAT).

Gihimo sa Office of the Senior Citizens Affairs (OSCA) ang maong panawagan human makadawat sa mga taho nga dunay mga establisamento nga nihatag na og 20 porsiyento nga diskwento sa mga senior citizen sa mga palaliton o pag-avail sa mga serbisyo apan wala gihapon kini ma-exempt sa 12% nga VAT.

Suma pa ni OSCA administrative staff member nga si Sheryl Blesbitero nga kasagaran sa mga reklamo nga iyang nadawat napuntirya sa mga botika diin dunay pipila ka mga botika atol sa ilang pakisusi nga nagdumili sa pag-deduct sa 12 porsyento nga VAT exemption tungod sa "management policy."

“Daghan kaayog nag lalis ana kay nay mga botika nga wala ni implement ana. Mao nang madala ra nila’g ilad-ilad ang mga senior, ilabi na ning mga senior nga dili kamao sa computation,” matud pa ni Blesbitero.

Gisaysay ni Blesbitero nga ang mga senior citizens nga nagpangidaron sugod 60 anyos pataas mamahimo na nga makatagamtam sa benepisyo ubos sa Republic Act 9994 o ang Expanded Senior Citizens Act of 2010, sama sa 20 percent discount ug exempted sa pagbayad og VAT.

Ang mga senior citizen makaangkon sa maong VAT exemption kung magpakita kini og ID, OSCA purchase booklet, ug resita.

Nipahimangno sab si Chito Aragon executive assistant ni Konsehal Pastor “Jun” Alcover Jr. ngadto sa mga establisamento nga respetuon ang mga pribilihiyo alang sa mga senior citizen sa siyudad. (BANAT NEWS)