Kalihokan sa turismo, mga klase gisuspenso

CEBU, Philippines — Pipila sa mga kalihokan sa turismo sa habagatang Sugbo ang gikanselar kagahapong adlawa tungod sa dili maayong panahon dala sa habagat.

Ang Coastguard Moalboal nagkanayon nga dili maayo ang pagpahigayon og  snorkeling, island hopping ug diving tungod sa dili maayong kondisyon sa dagat.

Ang canyoneering activities pud sa  Badian ug Alegria temporaryong gisuspenso. ".. the water level is still high and the water currents are still strong, Badian Canyoneering and Kawasan Falls is still temporarily closed for all activities today (September 17, 2024), until further notice." sumala sa LGU Badian pinaahi sa   Breathtaking Badian Facebook page niini.

Ang Kawasan Falls temporaryo pud nga gisirad-an. Samtang ang LGU sa Alegria miluwat pud og memorandum nga mirekomendar sa  Municipal Disaster Risk Reduction and Management Office nga suspensohon ang canyoneering tungod sa kusog nga agas sa tubig sa trail sa canyoneering site sa  Barangay Compostela nga makarisgo sa mga tursita ug personnel sa lungsod.

Ang Inambakan Falls sa lungsod sa Ginatilan sarado pud kagahapon.

Samtang sobra 20 ka LGUs sa Probinsya ang mikanselar pud og klase kagahapon, apil na niini ang Carcar city, Cordova, Minglanilla, Mandaue city,  Consolacion, Talisay city, , Toledo city,  Tuburan, Santa Fe, San Fernando, Danao city, Alegria, Naga City, Malabuyoc, Santander, Ginatilan, Boljoon, Sibonga, Moalboal, Badian ug Dumanjug sumala sa Provincial Disaster Risk Reduction and Management Office.

Sa alas 5 sa hapon nga rainfall advisory sa  PAGASA nagkanayon nga ang southwest monsoon o habagat maoy hinongdan sa kasarangan ngadto sa kusog nga pag-ulan sa pipila ka bahin sa habagatan ug amihanang Sugbo.  Sa Talisay City, si Association of Barangay Council (ABC) presidenti Josefina Concial nagkanayon nga gialerto nila ang mga kapitan aron makapangandam sa epekto aning dautang panahon.

Si Joel Sisa, operation head sa City Disaster Risk Reduction and Management Office (CDRRMO) nagkanayon nga aktibo karon ang ilang Community First Responders (CFR) nga mohatag kanila og situationer sa ilang dapit.-- Rowena Capistrano ug Gabriel Bonjoc/IBM BANAT NEWS