CEBU, Philippines — Paghikog di angay i-sensationalizeAng The Freeman uban sa igsuong publication niini nga Banat News nipahigayon sa "A Press Freedom Forum: Mental Health Matters" forum diha sa University of Visayas main campus niadtong Martes isip kabahin sa pagsaulog sa Cebu Press Freedom Week.
Ang forum giubanan sa mental health experts nga gilangkuban nila ni Dr. Robert Cañete ug Dr. Sherryl Abellanosa kinsa nipaambit sa mga panabot sa mga babag sa kahimsog sa pangisip ug nagpasiugda sa kamahinungdanon sa kahimsog sa pangisip sa mga miyembro sa media.
Si Iris Hazel Mascardo, reporter sa The Freeman ang nagsilbing reactor ug nipaambit sa iyang kasinatian sa pag-cover sa mga trauma story samtang anaa pa siya sa police beat sa wala pa siya madestino isip city hall beat reporter karon.
Usa sa labing importanteng mga gihisgotan sa forum mao ang dakong papel nga gihuptan sa journalists sa pag-report sa mga sensitibo nga mga estorya sama sa suicide.
Matud ni Abellanosa nga adunay news outlets nga gi-sensationalize ang pagsuwat niining mga estorya aron makakuha sa attention sa mga magbabasa diin ang maong pamaagi supak sa protocol sa World Health Organization (WHO). Ang protocol sa WHO kong mag-report kinahanglang ilakip sa mga journalist ang usa ka "content warning" nga nag-ingon nga sensitibo ang gihisgutan sa news article ug nag-mention kini og suicide.
Sundan dayon kini sa usa ka space aron tugotan ang mga magbabasa nga mohunong ug magdesisyon kong magpadayon ba sila sa pagbasa o dili.
Ang sulod sa news report kinahanglang anaa sa tanang higayon ang paglakip sa mga linya o numero kong asa makapangayo og tabang ang mga tawo nga nakasinati og mental health distress.
Kinahanglan usab nga ilakip sa estorya ang paghatag og gibug-aton nga ang paghikog malikayan uban ang mensahe sa paglaum ug kong unsay buhaton aron kini mapugngan.
Si Abellanosa nagkanayon nga dili kinahanglang isuwat o hisgutan ang paagi sa paghikog, ang lugar kong diin kini nahitabo, ingon man usab sa pagbutang sa mga hulagway sa naghikog o pag-live niini diha sa social media.
Matud usab ni Abellanosa nga ang epekto niini mahimong mosangpot sa "suicide contagion" diin ang mga huyang nga magbabasa pwedeng maimpluwensiyahan ug gamiton kining hinungdan nga mobuhat sa samang aksyon.
Gidili usab ang pag-post sa mga suicide notes tungod kay kini gamiton lang sa uban aron i-justify ang nahitabo.
Ang mga mental health professionals makigtambayayong sa media outlets aron masiguro nga adunay sensitivity ug husto ang pag-report sa sama niini nga panghitabo. Gidayeg ni Abellanosa ang The Freeman tungod kay sa tanang media outlets mao ra kini ang nisunod sa mga protocol nga gipadala kanila. BDB BANAT NEWS