MANILA, Philippines — Nipadayag og suporta ang Department of Social Welfare and Development (DSWD) Central Visayas sa national immunization program sa Department of Health (DOH) sa rehiyon aron makab-ot niini ang "Fully Immunized Child” (FIC) target.
Si DSWD Regional Director Shalaine Marie S. Lucero nipadangat sa pasalig sa ilang ahensiya sa pagpasiugda sa immunization pinaagi sa nagkalain-laing programa niini, partikular na ang Pantawid Pamilyang Pilipino Program (4Ps).
Ubos sa 4Ps nga programa, aron makadawat og cash grants ang mga benepisyaryo, kinahanglan nilang tumanon ang kondisyon sama sa pagbakuna sa mga bata nga nag-edad og 0-5, pag-monitor sa ilang timbang, pagsiguro sa prenatal ug postnatal nga pag-atiman sa mga mabdos, child delivery sa mga birthing center ug pagtambong sa Family Development Sessions (FDS).
Si Lucero niingon nga kining mga kondisyon nagtinguha nga mahimong responsable ang mga benepisyaryo sa panglawas ug edukasyon sa ilang mga pamilya.
Gawas sa 4Ps, ang DSWD naghatag usab og bakuna ug pag-amoma sa mga batang huyang, napasagdan, giabandonar, ug gisurrender nga anaa sa mga residential facilities ug social welfare agencies.
Dugang pa, ang departamento nagsuporta sa mga LGU pinaagi sa pagpausbaw sa kapasidad sa local social welfare and development offices (LSWDOS) sa pagpahigayon sa Parent Effectiveness Sessions, nga nagtutok sa child development, panglawas, ug parenting.
Sa kasamtangan, daghan gihapon ang mga batang wala mabakunahan sa Central Visayas suma sa semi-annual FIC accomplishment report sa DOH ning tuiga 2024, 29.32 porsyento pa ang nakab-ot, nga mas ubos kumpara sa target nga 95 porsyento.
Tungod niana si Dr. Jaime Bernadas, ang direktor sa DOH-7, nag-awhag sa mga stakeholders nga magpasiugda sa immunization bisan sulod sa ilang tagsa-tagsa ka pamilya.