CEBU, Philippines — Gipahibalo sa Visayan Electric ang mga bag-ong kalamboan nga ilang planong ipatuman sa mosunod nga mga adlaw aron mas mapanindot pa ang ilang serbisyo ug maghatag og kasayon para sa ilang mga konsumidor ug sa umaabot nga buot magpataud og linya sa kuryente.
Si Engr. Daryl Bonbon, ang Assistant Vice President sa Tech Support Group sa Visayan Electric atol sa Power Lunch nga giorganisar sa VE nga kabahin sa kalihokan sa ika-32 nga Cebu Press Freedom Week , mibutyag nga ilahang gamiton ang modernong teknolohiya pinaagi sa mobile apps niining ilang ilusad nga Service Application Administration Desk (SAAD).
Ang SAAD adunay tulo ka mga serbisyong makatabang og dako sa mga konsumidor ug sa mga tawong gustong magpataud og kuryente, nga pwedeng anha lang ipaagi sa ilang apps diha sa mga mobile phones.
Makita diha sa electronic Office of the Building Officials kun diin ang aplikasyon sa magpataud sa kuryente pwedeng diha nalang tan-awon kun nigawas na ang ilang electrical permits, ug dili na kinahanglang pisikal nga adtuon sa OBO. Gawas pa niini, kung unsay makita nga permit diha sa SAAD app, pwede na nga kadto maoy ipakita o iduso ngadto sa VE aron pagpataud sa kuryente.
Aron mas lapad ug maapil ang tibuok franchise area sa Visayan Electric, gitinguha nila nga makig-alayon o kolaborasyon ngadto sa mga OBO sa nagkadaiyang LGUs aron makonektado kini ngadto sa app.
Hinuon, giklaro ni Bonbon nga ang aplikante kinahanglan gihapong personal nga moduso sa ilang mga dokumento nga rekisitong gipangayo sa OBO aron mahatagan og permit. Ang nakabentaha lang sa e-OBO, di na kinahanglang magbalik-balik sa OBO aron mag follow-up sa aplikasyon kay makita na kini pinaagi sa SAAD app.
Samtang naa sab sa maong app ang listahan sa mga Visayan Electric accredited electricians nga makatabang sa mga gustong magpataud og kuryente.
Kining maong mga electricians mga sakop kini sa mga asosasyon nga accredited sa VE, samtang dili sila pareho og presyo apan makatabang ang app sa aplikante nga makapili basi sa kaya sa ilang budget.
Si Bonbon nagkanayon nga nahunahunaan sa VE ang paghimo niini nga app human nakita ang dakong bentaha paggamit niini atol sa pandemiya. Nakita nila nga epektibo kini nga pamaagi aron mamenusan ang kahasol sa mga gustong magpataud og kuryente.
Gawas sa SAAD, ang Visayan Electric aduna na say e-bills aron mahimong adto na mobayad pinaagi sa bank transfer o electronic transfer sa bayad, makita sab didto ang payment history ug ang readings sa konsumo sa matag panimalay. (BANAT NEWS)