CEBU, Philippines — Hingpit na nga miasumer sa katungdanan isip bag-ong officer -In-Charge (OIC) sa Lapu-Lapu City Police Office (LCPO) si Police Colonel Dyan Vicente Agustin.
Si Agustin maoy nihulip kang Police Colonel Ali Baron nga naghupot sa maong katungdanan sulod lang sa pipila ka bulan.
Ang paghulip kang Baron natigayon human sa nahitabong pagpangronda niadtong Agosto 31, 2024 sa nadiskubrehan nga Philippine Offshore Gaming Operator (Pogo) hub sa sulod sa compound sa Tourist Garden Hotel sa Barangay Agus sa siyudad sa Lapu-Lapu. Nunot sa pag-asumer sa katungdanan ni Police Colonel Agustin kini na maoy nangulo sa pagtambong sa gilusad nga Barangay Buhay Ingatan Droga'y Ayawan (BIDA)program nga gipahigayon sa Hoops Dome sa Barangay Gun-ob sa Siyudad sa Lapu-Lapu niadtong Sabado, Septiyembre 14, 2024.
Una niini nimando ang Department of Interior and Local Government (DILG) sa paglusad og imbestigasyon sa Pogo hub sa Tourist Garden Hotel sa Barangay Agus aron pagsuta sa kalambigitan sa mga local official sa illegal nga operasyon sa Pogo.
Gipasabot ni DILG Undersecretary Victor Llamas nga kon maghisgot og kalambigitan sa mga lokal opisyal wala kini magpasabot nga mga opisyal lang sa local nga kagamhanan sa maong lugar kon dili apil usab niini ang kapolisan. (BANAT NEWS)