Way hawsyaw sa imbestigasyon sa POGO sa Lapu-Lapu

CEBU, Philippines — Si Interior Secretary Benjamin “Benhur” Abalos Jr. mipasalig nga walay hawsyaw sa gihimong imbestigasyon sa maong hitabo ug tanang opisyales ug kawani sa gobiyerno, apil si Lapu-Lapu City Mayor Junard Chan sa ipatawag.

Si Abalos kinsa bag-o pang naabot gikan sa UAE mipahibalo sa The Freeman (igsuong pamantalaan sa Banat News)  bahin sa pagparelibo niya sa hepe sa Lapu-Lapu City Police Office(LLCPO) ug mga pangulo sa Regional Intelligence Division-7 ug Criminal Investigation and Detection Group (CIDG)-7.

Si Police Colonel Ali Baron kinsa niadto palang bulan sa Marso ning tuiga milingkod isip City Director sa LLCPO gimando nga pahulipan.

Samtang ang hepe sa RIID-7 nga si Police Colonel Gervacio Balmaceda  ug Regional Chief sa CIDG-7 nga si Police Colonel Marlon Santos gipangrelibuhan sab.

Ang kamandoan ni PNP PGen Rommel Francisco Marbil, ang tulo ibalhin sa PHAU, DPRM sugod kagahapon. Gawas nila, duna pay laing mga opisyal sa kapolisan nga imbestigahon lakip na mga lokal nga kawani sa City Hall sa Lapu-Lapu City.

Hinuon si Abalos miklaro nga wala silay gahum pagdisiplina sa mga opisyales sa LGUs kun mamatud-ang nalambigit sila sa POGO operation. Apan sila maoy aktibong nag-imbestigar niini apil na ang Office of the Ombudsman.

Giangkon sab ni Abalos nga duna silay giumol nga Task Force sama sa gihimo nila sa gitaktak nga si Bamban, Tarlac Mayor Alice Guo  niining insidente sa Lapu-Lapu City.

“Ang pagkakaiba kay Alice Guo, dalawa.. Una, meron siyang pag aari na share sa kumpanya. Pangalawa, nagbigay siya ng permit maski na hindi kumpleto ang requirements…Yun ang nangyari kay Alice Guo…Kaya siya natanggal at perpetually disqualified from office. Tapos pina file naming   sa Ombudsman..Ang Ombudsman ang nag file ng kaso sa kanya,” matud pang Abalos.  “Importante din yung transparency na malaman ng mga tao…Pangit yung mga haka-haka…Dyan nagsisimula yung distrust eh,” dugang pa niya. Subling gipahinumdoman ni Abalos ang mga LGU officials bahin sa iyang memorandum circular niadtong Hunyo nga nagpahinumdom sa ilang tahas ug gahum pag-regulate sa tanang mga negosyo ug ipatuman ang health, safety and building standards.

Ang mga ahente sa Presidential Anti-Organized Crime Commission (PAOC); National Bureau of Investigation ug Bureau of Immigration mironda sa usa ka hotel aron unta pag-rescue sa mga Indonesian nationals nga giingong pugsanong gipatrabaho didto.

Apan sa pagabot sa mga otoridad sa Tourist Garden Hotel and Restaurant sa Barangay Agus, Lapu-Lapu City, nadiskubrehan ang operasyon sa Philippine Offshore Gaming Operator(POGO).

Wala kini matud pa na-monitor sa maong mga opisyal hinungdan sa ilang pagkarelibo.

Si Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin masaligon gihapon sila nga ang Lapu-Lapu City Police Office magpabiling matinud-anon sa ilang trabaho bisan sa nahitabo sa ilang hepe. –Decemay P. Padilla ug /IBM BANAT NEWS