Kaso sa dengue sa Talisay nidoble – CHO

CEBU, Philippines — Gidaghanon sa kaso sa dengue sa Dakbayan sa Talisay nidoble matud ni Dr. Rey Cesar Bautista, acting officer sa Talisay City Health Office.

Matud ni Bautista nga gikan sa buwan sa Enero hangtud sa Hunyo niining tuiga niabot sa 58 ka kaso sa dengue ang ilang natala.

Ug gikan sa buwan sa Hunyo hangtud sa Agosto karon gihapong tuiga nadugangan kini og laing 58 ka kaso.

Hinuon wala sila’y natala nga namatay gumikan sa sakit nga dengue sa siyudad.

Si Bautista naalarma sa gidaghanon sa kaso hinuon matud niya nga dili kini angayang ikabalaka tungod kay padayon ang ilang pagpahigayon og misting sa mga lugar diin daghan ang kaso.

Sayo pa, si Konsehal Eduardo “Digul” Gullas III, chairman sa Committee on Education nihangyo sa mga ginikanan nga pahiran og mosquito repellent ang ilang mga bata sa dili pa moadto sa tunghaan  diin usa kini sa paagi nga ang lamok dili mopaak sa mga bata.

Sa laing bahin, gipahibalo ni Dr. Debra Catulong, city health officer sa Dakbayan sa Mandaue nga dili na angayang mabalaka ang mga molupyo tungod kay walay Monkey Pox sa Siyudad sa Mandaue.

Si Catulong nipadayag sa maong pamahayag human nag-negatibo ang resulta sa confirmation nga gihimo sa Research Institute of Tropical Medicine niadtong unom nga gikatahapan kinsa nakabaton og mga sintomas sa MPox.

Matud ni Catulong nga negatibo ang nigawas nga resulta sa confirmatory test nga gihimo sa Research Institute of Tropical Medicine.

Apan bisan pa niini, si Catulong niawhag sa mga Mandauehanon nga dili gihapon angayan nga mo kompiyansa.

Si Catulong nagkanayon nga kon makamatikod nga adunay  sintomas sa MPox  modangop dayon sa doktor alang sa pagpa-checkup. Romeo T. Limpangog/BDB) BANAT NEWS