P384 milyong supplemental budget sa Cebu City aprobado na

CEBU, Philippines — Giaprobahan na sa konseho sa Dakbayan sa Sugbo ang P384 milyones nga supplemental budget (SB) No. 2 sa 2024 atol sa ilang regular nga session niadtong Septiyembre 11, 2024.

Si Konsehal Noel Wenceslao, chairman sa committee on Budget and Finance nagkanayon nga ang hatagan og prayoridad nga gahinan sa maong budget mao ang P145 milyones alang sa garbage collection ug disposal, P100 milyones alang sa street paving and repairs, P70 milyones alang sa mga healthcare program, P38.8 milyones alang sa pundo sa scholarship program sa mayor, P36 milyones alang sa pagpalambo sa  information technology ug Cebu City Medical Center (CCMC), ug P10 milyones alang sa mga nangatanggong nga bayranan sa kagamhanan sa siyudad.

Gahinan usab sa supplemental budget 2 ang mga proyekto alang sa pagpalambo sa mga drainage ug sa serbisyo sa ospital ug health center sa siyudad.

Sa laing bahin, nimando si Acting Cebu City Mayor Raymond Alvin Garcia nga usgdan na sa pag-atiman sa supplemental budget No. 3 (SB3) aron masugdan na kini og andam karong buwan sa Oktubre niining tuiga ug malikayan ang pagkalangan sa paggahin og pundo alang sa health program sa kagamhanan sa siyudad ug ang pagpanghatag og bonus sa mga kawani sa gobiyerno lakip na ang mga job order personnel. BDB BANAT NEWS