Duha ka konsehal sa Mandaue niluwat sa chairmanship

CEBU, Philippines — Gibuhian sa duha ka sakop sa konseho  sa Siyudad sa Mandaue  ang gihuptan nilang komitiba sa tuyo nila nga mabakante kini ug mahulipan sa laing  sakop sa konseho nga mohupot niini.

Ang nisumiter sa ilang resignation isip chairman sa Committee on Agriculture mao si Konsehal Adjong Ouano-Icalina ug Konsehal Cesar "Sol" Cabahug isip chairman sa Committee on Energy sa konseho  sa siyudad.

Ang duha mga kaalyado kini ni Acting Vice Mayor Nerissa Soon-Ruiz nga una na nga gihulipan isip chairman sa Committee on Health sa konseho sa siyudad.

Sa iyang pagpasabot, si Icalina nagkanaon nga sanglit gikuhaan na man si Acting Vice Mayor Soon-Ruiz isip chairman sa komitiba nga iyang gihuptan klaro usab nga sila na ang isunod nga tang-tangan og komitiba.

Sa iyang bahin, si Cabahug nagkanayon nga bisan kon wala na sila maghupot og komitiba padayonon gihapon nila ang ilang naandan nga pagserbisyo isio mga piniling sakop sa konseho.

Gihulip isip chairman sa Committee on Agriculture si Konsehal Editha Cabahug ug  si Konsehal Cynthia Cinco-Remedio usab ang nihulip isip chairman sa Committee on Energy. Si Konsehal Editha Cabahug ug Konsehal Cinco-Remedio ang mga kaalyado kini ni Cortes. (BANAT NEWS)