CEBU, Philippines — Gipasusi ni acting Cebu City Mayor Raymond Alvin Garcia sa mga abogado sa Kagamhanan sa Dakbayan sa Sugbo kun unsaon nga paspas ang pag-proseso sa deed of donation sa luna sa Department of Health-7 nga anaa nahimutang sa South Road Properties.
Personal nga nakighimamat ang Assistant Regional Director Sophia Mancao ngadto kang Garcia diin nagpakisusi kini kabahin sa duha ka ektarya nga luna sa SRP nga gi-donar pipila na ka tuig ang milabay ug ubos pa kini sa administrasyon ni kanhi Mayor Tomas Osmeña.
“Until now we still don’t have the deed of donation but it has been processed since the time of Mayor Tomas Osmena. But, siyempre, wala dayon mahatag kay that time naa pay loan sa Landbank,” suma pa ni Mancao.
Matud pa ni Garcia nga gipatan-aw na niya sa legal office ang mga dokumento ug andam siya nga mopirma sa maong deed of donation.
Nasayran nga ang luna kun diin nagbarog ang Nustar Resort & Casino orihinal nga gipanag-iya sa DOH-7.
Si Mancao niingon nga gikinahanglan nila ang deed of donation sa siyudad aron matiwas na ang proyekto sa pagtukod unya ug Center for Disease Control. Bugtong laboratoryo pa lang nga maoy sub-national blood center diin nahimutang ang blood bank sa DOH-7, ang nagbarug sa maong dapit.
Samtang gisemento sa kagamhanan dakbayan sa Talisay ang 250 ka metros nga yuta nga gidonar sa pribadong indibidwal aron himoong agianan sa mga residente.
Apan giklaro ni Talisay City mayor Gerald Anthony “Samsam” Gullas nga dili pundo sa gobyerno ang gigamit niini.
Matud pa niya nga nangayo sila og tabang sa mga kompaniya nga naa sa siyudad aron makatigom og materyales. Ang pinakauwahi nila nga gitrabaho mao ang Purok Mangga, Barangay Mohon. (BANAT NEWS)