Lima ka garbage collector nasakpang  nangawat og puthaw sa DPWH

CEBU, Philippines — Nadakpan ang giingong lima ka empleyado sa Department of Public Services(DPS) sa Cebu City government kinsa gipasangilang nangawat og puthaw sa Department of Public Works snd Highways (DPWH)-7 sa South Road Properties human sa ilang pagpangolekta og basura niadtong Martes.

Ang mga suspetsado mao sila si Dismar Molo Bucao, 38-anyos, minyo, taga Barangay Bonbon, Lungsod sa Aloguinsan, drayber sa DPS; Rodel Husen Bautista, 29 , residente sa Sitio Ocampo Drive, Barangay Inayawan, Siyudad sa Sugbo, garbage collector;  Rodolfo Iligan Cabido, Jr., 29, minyo, nagpuyo sa Sitio Dumpsite Whiteroad, Barangay Inayawan, garbage collector; Vergil Sungahid, 31, taga Sitio Dumpsite Whiteroad, Barangay Inayawan, garbage collector ug Jerry Donoso Daplin, 30, molupyo sa Sitio Dumpsite Whiteroad, Barangay Inayawan usa usab ka garbage collector.

Ang mga suspetsado gitugyan sa representante sa DPWH-7 ngadto sa Mambaling Police Station sa Cebu City Police Office (CCPO).

Base sa taho sa Mambaling Police Station nga ang mga suspetsado garbage collectors sa DPS ug sub-con personnel sa DPWH-7.

Gikataho nga naaktohan ang mga suspetsado nga nanguha og tulo kabuok puthaw nga gamiton sa pagtukod og taytayan diin ilaha kining gitagoan sa mga basura sa garbage truck.

Matud ni Police Major Efren Diaz, Jr., hepe sa Mambaling Police Station nga base sa pangangkon sa mga suspetsado unang higayon nila kining gihimo.

Apan base sa impormasyon sa DPWH kanunay sila’ng mawad-an og materiyales maong gisubay nila kini ug nasakpan ang mga suspetsado.

Ang mga nakuha nga puthaw giingong ibaligya sa mga suspetsado sa junkshop.

"Worth P300,000 ang mga materiyales nga nawala kagahapon", dugang ni Diaz.

Nunot niini, ang pangulo sa DPS John Paul Gelasque niklaro nga dili trabahante sa ilang buhatan ang lima ka suspetsado.

Matud ni Gelasque nga ang mga suspetsado mga empleyado kini sa private contractor nga tigkolekta sa mga basura sa siyudad.

Gipahibawo ni Gelasque ang head contractor nga maoy employer sa mga suspetsado kabahin sa hitabo.

Ang DPS magpadayon sa ilang pagpahigayon sa imbestigasyon sa maong insidente. (BANAT NEWS)