Drayber sa traysikol patay sa aksidente sa kadalanan

CEBU, Philippines — Patay ang usa ka tricycle driver nga senior citizen sa nahitabong aksidente sa kadalanan diha sa national highway sa Barangay Tulic, Lungsod sa Argao niadtong Martes sa gabii.            

Ang biktima mao si Eduardo Landongan, 62-anyos, residente sa Upper Candabong, Barangay Binlod sa maong lungsod.

Base sa taho sa Argao Police Station ang tricycle ug Ceres bus nagbiyahe sa pareho nga direksyon gikan sa north paingon sa south direction.

Ang tricycle nga nagbiyahe sa outer lane sa highway nag-una sa Ceres bus.

Sa pag-abot diha sa naasoy nga lugar ang biktima nakabantay sa tinapok nga balas ug graba kilid sa highway.

Nalatayan sa side wheel sa tricycle ang balas ug graba hinungdan nga ang biktima wala na makakontrolar sa gimaneho niining tricycle.

Ug gumikan sa maong hitabo naligid ang tricycle sa inner lane ug naigo niini ang Ceres bus hinungdan sa pagkalabay ni Landongan ug nitugpa kini atubangan sa bus.

"Didto siya nasud sa ilalom sa dulong. Naka-full brake na ang bus pero wala gyud siya ingon nalatayan kay wala man tay nakit-an nga blood stain ilawom sa bus", matud ni Patrolman Ranel Macapapas, imbestigador sa Argao Police Station.

Ang biktima gidala sa Argao Municipal Disaster Risk Reduction and Management Office ngadto sa Isidro C. Kintanar Memorial Hospital sa Barangay Bogo, Lungsod sa Argao apan gideklara kini nga patay na pag-abot sa tambalanan gumikan sa grabeng kadaot nga naangkon niini sa iyang ulo. (BANAT NEWS)