CEBU, Philippines — Temporaryong gipasirad-an sa lokal nga kagamhanan sa Moalboal ang island hopping nga kalihokan sa lungsod kagahapong adlawa. Kini gumikan sa abiso sa Coast Guard nga wala lang usay island hopping tungod sa dagkong bawod ug dili maayong kahimtang sa kadagatan.
Sumala sa Moaboal Tourism, ang maong lakang gihimo aron malikayan nga adunay disgrasya nga mahitabo sa mga bisita.
Ang Island hopping sa Moalboal mosuroy sa dili momenus tulo ka sites – sa Pescador Island, Panagsama beach ug sa Tongo point.
Ang island hopping sa Moalboal maoy usa sa mga tourism activities sa Sugbo nga kanunay himoon sa mga turista. Nasayran gikan sa Moalboal Tourism Office nga sa regular o mingaw nga adlaw, moabot sa kapin sa 20 ka byahe ang mahitabo.
Ang Moalboal pinaagi sa Panagsama beach bag-o pa nakadawat og pasidungog isip usa sa mga “Best Beaches in Southeast Asia” base sa usaka luxury ug lifestyle travel magazine nga Condè Nast. (BANAT NEWS)