CEBU, Philippines — Nipasidaan ang Philippine Statistics Authority (PSA) Central Visayas sa publiko batok sa dili awtorisado nga pag-imprenta sa digital copies sa National ID ngadto sa PVC card.
Hugot nga gidili sa PSA ang paghimo ug pag-imprenta niini sa PVC nga mga kard, sumala sa public advisory nga gipagawas niadtong Septyembre 9, 2024.
Busa, ang dili awtorisado nga pag-imprenta sa National ID sa PVC card ug sa ubang mga materyales, pag-andam, o pag-isyu ni bisan kinsang tawo o institusyon, mamahimong silotan.
Ang bisan kinsang mapamatud-an nga sad-an silotan og tulo ka tuig ngadto sa unom ka tuig nga pagkabilanggo ug multa nga P1,000,000.00 ngadto sa P3,000,000.00
Ang mga Digital National ID nga giimprinta sa PVC dili dawaton isip pamatuod sa pagkatawo ug edad sa bisan unsang publiko ug pribado nga mga transaksyon.
Uban niini, si Engr. Felixberto M. Sato Jr., Supervising Statistical Specialist sa PSA-7 nag-awhag sa publiko sa paggamit sa plataporma nga National ID Check pinaagi sa https://everify.gov.ph/check aron ma-verify ug ma-authenticate ang ilang Digital National ID pinaagi sa pag-scan sa QR code.
Nagpahinumdom usab ang PSA nga ang bisan unsang ahensya sa gobyerno o pribadong institusyon nga magdumili pagdawat sa Digital National ID isip balido nga identification pamultahon og P500,000. (BANAT NEWS)