Hepe sa kapolisan sa Cordova, Carbon relibohan

CEBU, Philippines — Hulipan sa katungdanan ang hepe sa Marigondon Police Station nga si Police Major Judith Besas diin giingong usa sa hinungdan niini mao ang gironda nga Pogo hub sa Barangay Agus, Dakbayan sa Lapu-Lapu sa niaging semana.

Kini ang gikompirma ni Police Lieutenant Colonel Christian Torres, tigpamaba sa Lapu-Lapu City Police Office (LLCPO) ug mao usab ang kasamtangang admin officer.

Nagkanayon si Torres nga subay kini sa kamandoan nga ilang nadawat nga relibohan ang hepe.

Gikatahong usa sa rason nga relibohan si Besas gumikan sa nadiskubreng Pogo hub sa Barangay Agus nga gironda sa National Bureau of Investigation (NBI),  Presidential Anti-Organized Crime Commission (PAOCC), Inter-Agency Council Against Trafficking (IACAT), Bureau of Immigration ug Department of Social Welfare and Development.

Sa laing bahin, niasumir na sa katungdanan ang bag-ong hepe sa Carbon Police Station sa Cebu City Police Office(CCPO) diin gipahigayon kagahapon sa buntag ang turnover ceremony diha sa conference room sa CCPO building.

Nangulo sa turnover ceremony si Police Colonel Antonietto Cañete, acting city director sa Cebu City Police Office.

Si Police Major Eric Gingoyon maoy nihulip kang Police Major Philip John Libres isip hepe sa maong police station.

Si Gingoyon gikan kini sa Lapu-Lapu City Police Office samtang si Libres temporaryong gibutang sa Police Regional Office (PRO)-7.

Nagpasalamat si Cañete sa serbisyo nga gihatag ni Libres isip hepe sa Carbon Police Station nga nakatampo sa kahapsay ug kalinaw sa Siyudad sa Sugbo.

Gihulagway sa CCPO ang maong kausaban nga normal kini nga mahitabo sa ilang organisasyon nga madestino bisan asa alang sa kalamboan sa ilang karera.

Si Cañete nimando sa bag-ong hepe sa Carbon Police Station nga iprayoridad ang deployment ug i-maximize ang resources aron masiguro nga mahatag ang tukmang seguridad.

Nasayran nga i-evaluate ni Cañete ang performance sa mga hepe sa kapolisan apil usab ang gidugayon nila hinungdan nga posibleng aduna pay mahitabong lahugay sa mga hepe. (BANAT NEWS)