Luna sa Kalunasan bawion sa kagamhanan sa Dakbayan sa Sugbo

CEBU, Philippines — Human sa panagtigom sa Task Force Pabahay nagplano karon ang Kagamhanan sa Dakbayan sa Sugbo nga bawion ang 4.3 ka ektarya nga luna nga nahimutang sa Barangay Kalunasan nga gidonar niini ngadto sa Evangelical Free Church human nga napakyas kini sa pagtuman sa nalatid sa kontrata sa donasyon lakip niini ang pagtukod og sementeriyo.

Nitambong sa maong tigom si Paquito Melicor, executive director sa Department of Environment and Natural Resources (DENR), opisyales sa City Environment and Natural Resources-7, Cebu City Police Office, Office of the Building Office, Division for the Welfare of the Urban Poor, ug developer sa Turtles Nest Condominium alang sa 4PH Program.

Ang maong donasyon nahitabo niadtong panahon pa sa kanhi mayor sa Dakbayan sa Sugbo Eulogio Borres.

Niabot sa 5.4 ektarya ang luna nga posibleng bawion sa siyuda nga gilangkuban sa 4.3 ektarya nga gidonar ngadto sa Evangelical Free Church ug 1.1 ektarya nga gidonar usab ngadto sa DENR-7.

Matud ni Konsehal Jerry Guardo, tipik ang maong plano sa pagbawi sa donasyon sa pagpaningkamot usab sa kagamhanan sa siyudad nga makapangita og luna alang sa housing project nga kapoy-an sa mga papahawaon gikan sa daplin sa mga sapa dinhi sa siyudad.

Matud ni Melicor nga ang ilang luna gigamil nila nga Wildlife Rescue Center sa mga mananap sama sa mga bitin, unggoy, buaya, langgam, ug uban pa.

Si Melicor nagkanayon nga wala siya’y problema kong adunay laing luna nga ihatag o ibaylo ang siyudad alang sa ilang rescue center kong kuhaon gyud ang luna.

Apan gisugyot kini nga ibalhin ang maong rescue center sa Barangay Guba.

Giklaro ni Melicor nga ang ilang buhatan sa kaulohan ang mohukom sa pagbalhin sa ilang center ngadto sa Guba gikan sa Kalunasan. (BANAT NEWS)