Pagpanghatag sa social pension himoon na matag buwan
CEBU, Philippines — Himoon na nga kada buwan ang payout kun pagpanghatag sa madawat sa mga benepisyaryo sa Social Pension program sa Department of Social Welfare and Development (DSWD).
Kini nonot sa kamanduan ni Secretary Rex Gatchalian sa tanang field offices nga sundon ug gamiton ang bag-ong schedule sa distribution aron masiguro nga ang mga benepisyaryo makadawat sa ilang stipend nga mas subsob.
Ubos sa Memorandum Circular sa DSWD nga gi-isyu niadtong Mayo 7 sa tibuok rehiyunal nga opisina, ang kalihim niingon nga dili na itugot sugod Hulyo 1 ang semestral payment sa social pensions.
Uban sa bag-ong mga iskedyul, ipadayon sa DSWD ang pagbalhin sa pundo ngadto sa LGU, diin kini ang mag-apod-apod ngadto sa mga benepisyaryo gamit ang gipili o mas angay nga iskedyul, ilabi na kadtong nagpuyo sa Geographically Isolated and Disadvantaged Areas (GIDA) o uban pang naa sa lisud nga kahimtang.
Kinahanglang ipasa sa mga LGU ang bag-ong kalamboan ngadto sa mga benepisyaryo pinaagi sa ilang tagsa-tagsa ka Offices of Senior Citizens Affairs (OSCA).
Ang DSWD Field Office - Central Visayas nakigkasabot na sa 130 ka lokal nga kagamhanan aron direktang ibalhin ang pundo ngadto sa ilang fiscal authority ug gamiton ang ilang mga personnel aron mapadali ang paghatud sa mga stipend.
Sumala ni DSWD Regional Director Shalaine Marie Lucero, ang bag-ong mga iskedyul mas angay sa panginahanglan sa mga senior citizens, nga maghatag kanila og mas daghang kapilian sa paggamit sa ilang mga stipend imbes nga limitado sa usa ka payout. Sa Central Visayas, 299,737 ka senior citizens nga huyang, masakiton, o adunay mga kakulian, nga walay suporta sa pamilya ug pension ang nakadawat na sa ilang gipa-uswag nga P1,000 stipend sa unang semester sa 2024. (BANAT NEWS)
- Latest
