DBM mihimakak nga gikunhoran ang mga miyembro sa Philhealth

CEBU, Philippines — Giklaro sa Department of Budget and Management (DBM) nga walay mahitabong pagkunhod sa gidaghanon sa mga miyembro sa Philippine Health Insurance Corp. (PhilHealth) sukwahi sa "bakak, makapahisalaag, ug malisyoso" nga pahayag sa usa ka Medical Action Group.

Sa usa ka pamahayag, si DBM Secretary Amenah Pangandaman niingon nga dili tinuod nga "gi-unilaterally removed" sa DBM ang Philippine Health Insurance Corporation (PHIC) coverage alang sa 30 ka milyon nga mga miyembro sa Pantawid Pamilyang Pilipino Program (4Ps), senior citizens, ug persons with disabilities (PWD) ug ilang mga dependent karong tuiga.

Iyang gipasabot nga and DBM dili mahimong makatangtang sa PHIC coverage o pakunhuran ang gidaghanon sa mga miyembro niini, kay nagtuman kini sa nalatid sa giaprobahan nga FY 2024 General Appropriations Act (GAA).

Si Pangandaman niingon nga ubos sa Universal Health Care Act, ang tanang Pilipino adunay katungod sa health insurance, direkta man o dili direkta nga contributor. Gi-subsidize usab sa gobyerno ang mga premium para sa mga dili makasarang niini, pagsiguro nga bisan ang mga huyang nga grupo magpabilin nga nasakup.

Giklaro niini nga dili tinuod ang gikatahu nga dunay milyon-milyon nga nawad-an sa ilang coverage, kay ang PhilHealth gipundohan og maayo aron matuman ang mga obligasyon niini. Ang tahas sa DBM, matud niya, mao ang pagpatuman sa nasudnong budget nga transparent ug ipahibalo sa publiko.

Giawhag sa Kalihim ang Medical Action Group nga mahimong responsable sa mga pamahayag niini sa social media.

Panawagan usab ni Pangandaman sa publiko nga gamiton ang social media sa maayong paagi, nga nagtinguha sa pagpauswag imbis nga magpakatap og sayop nga impormasyon.

Ang DBM nikonsulta na karon sa ilang legal nga grupo alang sa posibleng pagpasaka og legal nga aksyon batok sa medical group.