Kanhi beauty queen nakombikto sa kasong estafa

CEBU, Philippines - Usa ka negosyante ug kanhi beauty queen napamatud-ang guilty sa kasong estafa tungod sa pag-isyu og duha ka nanguntol nga tseke nga giisyu niini niadtong 2018 kay walay igo nga pundo sa bangko.

Ang Regional Trial Court Branch 89 Judge Eric Lucila M. Cad-Enjambre mihukom nga si Aida Patana Mananquil "guilty beyond reasonable doubt of estafa" ubos sa Article 315, paragraph 2(d) sa Revised Penal Code, nga giusab sa Republic Act No. 10951.

Niadtong Agosto 19, 2024, si Mananquil gisilotan sa pagkapriso sulod sa unom ka tuig ug usa ka adlaw hangtod walo ka tuig, walo ka bulan, ug usa ka adlaw.

Gimandoan usab siya nga mobayad sa nireklamo og P606 mil uban sa says-porsyento nga interes kada tuig gikan Abril 2023 hangtod nga mabayran ang tibuok utang.

Matud pa sa desisyon, nakita sa korte nga si Manangquil sad-an sa pag-isyu ug nanguntol nga tseke, kini bisan og nakadawat na kini og “notice of dishonor” gikan sa bangko apan napakyas siya sa pagbutang og pundo para niini.

Niadtong Huwebes, si Mananquil gidakop ug gitanggong sa Mandaue Police Station 6, apan gikataho nga nakagawas kini human mibayad og multa nga Php 120,000.

Gisuwayan pagkuha sa Banat News ang habig ni Mananguil apan wala siya mitubag sa mga mensahe.

Sa iyang Facebook account, nag post siya og hulagway sa usa ka simbahan nga may caption, “Thank you lord, dili ko perpekto pero wala ko nimo pasagdi thank you everyone sa love and care ninyo i really appreciate it.” --Jonnavie Villa/IBM