17 anyos nga nakuhaan og shabu itugyan sa CSWS sa Mandaue

CEBU, Philippines — Padayon ang imbestigasyon sa Philippine Drug Enforcement Agency (PDEA)-7 kalabot sa pagkasikop sa 17-anyos nga lalake ug nakuhaan og duha ka kilo nga shabu sa ilang operasyon sa dakbayan sa Mandaue sa miaging adlaw.

Sigon sa tigpamaba sa PDEA-7 Leia Alcantara nga ang 17-anyos dili gyud maoy subject sa buy-bust operation.

Sa tulo ka semana nga case build up nila ang ilang target gyud ang ilang ka transaksiyon apan nakurat nalang sila nga dihang gihimo ang operasyon ang menor de edad ang naabtan.

Nasayran nga niadtong Lunes pa naabot sa Sugbo gikan sa Lungsod sa Ubay, Probinsya sa Bohol ang menor de edad ug nag-istar kini sa dakbayan sa Lapu-Lapu.

Sa Mandaue City natigayon ang buy-bust operation tungod kay didto kini nakigsabot.

"Gi work on na sa among team nga ma turnover siya sa CSWS sa Mandaue City kay minor paman gud", sigon ni Alcantara.

Gi-interview sa mga operatiba ang menor de edad apan menus ang mga impormasyon nga gibutyag niini.

Apan paningkamutan sa otoridad nga makakuha og dugang impormasyon ilabi na kun si kinsa ang nagsugo ug asa gikan ang illegal nga drugas. (BANAT NEWS)