Dul-an P10milyones danyos sa tulo ka managlahing sunog
CEBU, Philippines — Dul-an sa P10 milllion nga mga kabtangan ang naabo sa tulo ka managlahing insidente sa sunog sa dakbayan sa Sugbo ingon man sa lungsod sa Carmen.
Sa lungsod sa Carmen, Cebu, mokabat sa 11 ka panimay ang nasunog nga dunay gibana-bana nga danyos nga moabot sa P8.4 million, suma pa ni Fire Officer 2 Kevin Casinto, fire and arson investigator sa Carmen Fire Station.
Suma pa ni Casinto nga nakadawat sila og alarma sa sunog alas 12:05 sa kadlawon sa September 7, 2024 ug misaka kini ngadto sa second alarm.
Ang mga panimay nga nasunog diin kadaghanan ginama sa kahoy ug semento nahimutang sa barangay Cogon East sa nahisgutang lungsod.
Sa iniyal nga ihap gilangkuban kini sa 20 ka pamilya nga dunay 84 ka indibidwal, hinuon way gikatahung nakalas ug nasamdan sa maong insidente.
Ang sunog hingpit nga napawong alas 12:50 sa kadlawon ug padayon pang giimbestigar sa kabomberohan ang hinungdan sa pag-ulbo sa kayo
Samtang niulbo usab ang sunog sa duha ka andana nga apartment sa Calli AZul St., barangay Lahug, Cebu City nga gipanag-iya ni Ana Ramirez.
Si Fire Officer 1 Marvin Romana, sa Cebu City Fire Station miingon nga ilang giisa ang first alarm alas 8:23 sa buntag ug hingpit nga napawong ang kayo alas 8:42 sa buntag nga dunay gibana-bana nga danyos nga moabot sa P1.2 million.
Usa lang ka pamilya nga naglangkub sa 17 ka indibidwal ang nagpuyo sa nasunog nga propedad.
Samtang lima usab ka firetruck ang niresponde sa nasunog nga mini fuel tanker sa North 7 Road St. diha sa barangay Carreta niadtong Biyernes sa gabii.
Suma pa ni Romana nga nakadawat usab sila og alarma alas 11:25 sa gabii sa September 6, 2024 ug hingpit ra kini nga napawong alas 11:49 sa gabii.
Nakaangkon og second degree burn sa lain laing parte sa iyang lawas ang 24 anyos nga si Vincent Enon ug dali siya nga gidala sa tambalanan.
Ang bana-bana nga danyos sa maong sunog miabot og P200,000 ug padayon pa nga giimbestigar sa kabomberohan ang hinungdan sa sunog.(BANAT NEWS)
- Latest
