CEBU, Philippines — Aron dili mabalda ang regionalized bar examination nga himoon sa University of San Jose-Recoletos Basak Campus karong adlawa, Domingo, September 8, 2024 ang kagamhanan sa siyudad sa Sugbo nipatuman og liquor ban sulod sa 100-meter radius sa maong tuhanghaan.
Kini subay na sa Executive Order No. 17 s.2024 nga gipagawas ni Cebu City Acting Mayor Raymond Alvin Garcia.
Nagsugod ang liquor ban sa ala alas-12 sa tungang gabii sa Domingo ug matapos kini alas 11:59 sa Domingo gihapon sanglit mao kini ang unang adlaw sa bar examination.
Mopatuman gihapon og liquor ban ang Cebu City Government sa Septyembre 11, Miyerkules ug Septyembre 15, Domingo. Dili lang ang liquor ban ipatuman apan apil na ang anti-noise ordinance.
Nasayran nga alas 2 pa lang sa kadlawon gipakatap na ang 70 ka mga police nga magbantay sa seguridad sa sulod ug gawas sa testing center. (BANAT NEWS)