Code White Alert giisa tungod sa dengue

CEBU, Philippines — Gipaubos karon ang siyudad sa Mandaue sa Code White Alert Level tungod sa nagkataas nga kaso sa dengue.

Subay niini padayon usab nga giawhag ang mga molopyo nga magmabinantayon sa mga lamok nga nagdala maong sakit. Suma ni Dr. Debra Catulong, City Health Officer sa Mandaue nga importante sa mga molopyo sa kabarangayan sa paghimo og precautionary measures pinaagi sa pagbungkag sa mga dapit nga mahimong itlloganan sa lamok.

Naglakip na niini ang pagpanglimpyo kanunay sa palibot pinaagi sa pagyabo sa napundong tubig ug uban pa.

Gisugyot usab ang paggamit og mga repellent lotion aron kalikayan ang lamok.

Si Dr. Catulong miingon nga angay hinumdoman sa mga molopyo nga ang lamok nga nagdala og sakit nga dengue mohimo kini sa pagpaak duha ka oras sa dili pa mosilang ang adlaw ug duha usab ka oras sa dili pa mosawop ang adlaw.

Kini ang hinungdan nga gipasiugdahan ang 4 O'clock habit alang sa pagpanglimpiyo sa palibot.

Samtang gipatuman na sa lungsod sa Minglanilla ang search and destroy batok sa mga lamok nga nagdala og dengue.

Si mayor Rajiv Enad pinaagi sa iyang Facebook post nipahibawo nga sugod kagahapon ilang gipatuman ang Executive Order No. 12 series of 2024 o ang pag activate sa anti-dengue surveillance.

Ila sab nga himuon ang search and destroy operations sa tanang purok sa kabarangayan sugod sa alas 4 sa hapon.

Nagkanayon si Enad nga tinguha nila ang pagmenos sa risko sa dengue outbreak ug maprotektahan ang panglawas sa matag residenti.

Nihangyo si Enad ngadto sa katawhan nga motabang sa kampanya.

Ang dengue usa ka sakit nga dala sa lamok nga hinay-hinay nga mopatay sa katawhan kung kini mapasagdan.  (BANAT NEWS)