Babayeng nagkuha’g police clearance duna diay warrant

CEBU, Philippines — Gidakop ang usa ka 47 anyos nga babaye dihang nikuha kini og national police clearance sa Mabolo Police Station 4 sa Cebu City Police nasuta nga duna diay kini pending warrant of arrest sa kasong qualified theft.

Ang insidente nahitabo niadtong Biyernes sa alas 4 sa hapon, Septyembre 6, 2024 sa buhatan mismo sa Mabolo Police Station.  Gikustodiya sa Mabolo Police Station ang 47-anyos nga babaye, residente sa Lungsod sa Minglanilla.

Nagkanayon si Police Major Romeo Caacot Jr., hepe sa Mabolo Police Station nga samtang nagkuha og national police clearance ang akusado nahibaw-an nga duna kini pending warrant of arrest.

Si Judge Panfilo Intud Sala Jr., Acting Presiding Judge sa Regional Trial Court Branch 28 sa dakbayan sa Mandaue ang nag-isyu sa warrant of arrest sa kasong qualified theft penetsahan Agosto 2023 ug dunay piyansa nga P40, 000.

Sigon ni Major Caacoy nga ilang police clearance konektado sa ilang e-warrant diin makita kun ang usa ka tawo nga mokuha og police clearance duna bay pending warrant of arrest nga giluwatan sa korte. (BANAT NEWS)