RHPU wala pa manakop sa mga sakyanan nga walay plaka

CEBU, Philippines — Ang Regional Highway Patrol Unit (RHPU)-7 wala una manakop tungod kay wala pa ipatuman sa Land Transportation Office (LTO)-7 ang “no plate, no travel” policy.  Si Police Lieutenant Colonel Wilbert Parilla, hepe sa RHPU-7 nagkanayon nga sa ilang mga checkpoint kon aduna sila'y masita nga walay plaka nga sakyanan awhagon nila kini nga kuhaon ang ilang plate numbers.

Gihulagway sa RHPU-7 nga ang LTO-7 naningkamot nga mahatag ang assigned plate numbers ilabi na sa mga sakyanan nga adunay assigned plate numbers.

"So far wala sa ta’y gibuhat, purely advice ra gyud ta karon as of now because of the advice from the LTO for extension until December 31", matud ni Parilla.

Naobserbahan sa RHPU-7 ilabi na sa ilang checkpoints nga  daghan pa ang walay plate numbers ilabi na ang mga motorsiklo.

Kini gumikan kay 50 porsyento sa mga motorsiklo dili na maoy tag-iya ang uban naimbargo na unya nabaligya usab ngadto sa lain unya ang mga nag-unang registered owner dili na maka-follow up sa plate numbers.

"So mao sad nay usa sa difficulty sa mga motorists nga dili na nila mahibaw-an kong asa nila nakuha tong sa previous owner ang ilahang motor so maglisod sila..But as of now ang paghatag sa plaka already in the LTO so ang LTO naman sila maoy naghatag", pasabot ni Parilla.

Kagahapon ang mga personnel sa RHPU-7 gipaubos og seminar ilabi na kadtong bag-ong nadestino diha sa RHPU-7 isip usa sa rekesitos sa dili pa ma-deputized sa LTO-7.

"We have 12 personnel nga bag-o mao na kinahanglan sila og deputization seminar before sila mahatagan of TOPs ug ma-deputized", dugang ni Parilla. BDB BANAT NEWS