PSA: Employment rate nisaka sa bulan sa Hulyo

CEBU, Philippines — Nisaka ang employment rate o gidaghanon sa mga nakatrabaho nga Filipino sa tibuok nasud sa bulan sa Hulyo niining tuiga base sa datos sa Philippine Statistics Authority (PSA).

Sa gihimong Labor Force Survey nga gipahigayon sa PSA nasuta nga nisaka sa 95.3 porsyento ang employment rate sa bulan sa Hulyo samtang sa niaging tuig sa susamang bulan 95.1 porsyento lang.

Samtang ang unemployment rate sa nasud sa bulan sa Hulyo anaa sa 4.7 porsyento diin nikunhod kini gikan sa 4.9 porsyento sa susamang period sa nilabay’ng tuig.

Sa maong survey, anaa sa 2.3 milyones ka tawo nga unemployed o walay trabaho.

“This was higher than the estimated number of unemployed persons of 2.29 million in July, 2023 and 2.04 million in April 2024”, base s report sa PSA.

Matud sa maong ahensiya nga ang services group maoy sektor nga anaa sa top 1 o aduna pinakadaghan nga adunay trabaho nga niabot sa 47.70 milyones ang mga adunay trabaho nga indibidwal.

Samtang ang top 5 nga sub-sectors nga nakatala og tinuig nga pagsaka sa gidaghanon sa mga nakatrabaho nga indibidwal sa bulan sa Hulyo karong tuiga gilangkuban sa wholesale ug retail trade; repair sa mga motor vehicles ug motorsiklo, 1.07 milyones; agriculture ug forestry, 936,000; accommodation ug food service activities, 512,000; public administration ug defense; compulsory social security, 385,000; ug construction, 171,000.

Sa laing bahin, nikabat sa 1,300 ka bakanteng position sa trabaho ang gitanyag sa 22 ka ahensiya sa kagamhanan atol sa pagsaulog sa ika-124 nga anibersaryo sa Civil Service Commission.

Gipahigayon ang job fair diha  sa usa ka mall sa Dakbayan sa Sugbo sulod sa duha ka adlaw.

Matud ni Atty. Ariel Bacatan, director sa CSC -7 nga tumong sa maong job fair aron mahatagan og kahigayonan ang mga nagtinguha nga moserbisyo sa nagkadaiyang ahensiya sa gobiyerno.

Samtang nagpahigayon usab og susamang job fair ang CSC sa region 8 diin nakatala sila og 225 ka job seekers kagahapon.

Gilangkuban sa 19 ka government agencies sa Eastern Visayas ang niapil sa job fair diin diin adunay 200 ka job vacancies. Rowena D. Capistrano/BDB BANAT NEWS