CEBU, Philippines — Mga ginikanan sa duha ka mga grade 10 nga tinun-ang lalaki sa Don Vicente Rama Memorial National High School pormal nga nisang-at og reklamo diha sa buhatan ni Kapitan Dave Tumulak, sa Barangay Basak Pardo, kagahapon, Martes sa buntag.
Ang magtutudlo nga nagkupot sa subject nga MAPEH gipasanginlang mipaak sa ilang mga anak kay nasuko nga wala pahaloka ug wa gipakita kaniya ang mga “abs” sa mga bata.
Ang maong magtutudlo wala mohatag og pamahayag sa mga sakop sa media may labot sa reklamo.
Ang amahan sa 17-anyos nga tinun-an miingon na trauma ang iyang anak kay gihadlok nga pa- ‘sit-on the air’ maong napugos kini pagpakita sa iyang abs ngadto sa maestro.
Apan gikatahong “nanggigil” kini ug gipaak ang likod sa iyang anak mao nga dunay lakra sa ngipon sa likod sa bata.
Ang maong amahan miingon nga gipasaylo na nila kini apan pasakaan gihapon nila kini og kaso kay nakita niya nga dili sensiro ang pagpangayo sa pasaylo sa maong maestro.
Samtang ang inahan sa 14-anyos nga estudyante nga unang gipaak, miingon gipaak ang bukton sa iyang anak kay wala mosugot nga hagkan sa maong maestro.
Gitug-an sa maong inahan nga makadaghan nang nisumbong ang iyang anak batok sa maong magtutudlo apan gatuo ra siya nga binuang lang.
Matud pa niya, nahibulong siya kay magul-anon na ug pirmeng mohangyo nga mobalhin og laing eskuylahan kay ‘gikapoy’ na kini sa maong maestro.
Gani gikatahong dihay higayon nga atubangan sa klase gikatahong gustong motan-aw sa maestro sa kinatawo sa iyang anak kun tuli na ba kini ug patabunon lang sa ilang mga mata ang mga classmates.
Si Tumulak miingon nga gipatawag niya ang maestro ug mga ginikanan para unta husayon.
Apan nakita niyang desididong kasohan sa mga ginikanan ang magtutudlo maong mohatag siya kanila og Certificate to File Action aron magamit nila sa pagduso na nila sa ilang kaso ngadto sa piskalya.
Si Tumulak, niawhag sab social workers sa siyudad nga ipaubos sa stress debriefing ang mga bata.
Si Noel Auxtero, Head Teacher 3, Senior High Coordinator sa DVRMNHS, nitug-an nga human nibuto ang maong reklamo daghan silang nadawat nga reklamo gikan sa uban pang mga tinun-an batok gihapon sa maong magtutudlo.
Niduso na sab sila og incident report ngadto sa Division Office bahin niini aron sila maoy moaksyon batok sa ilang kauban.
Si Director Salustiano Jimenez, ang Regional Director sa DepED-7 pinaagi sa mensahe nga gipadala niini sa Banat News, kini nibutyag nga dili niya i-tolerate ang gihimo sa maong magtutudlo apan kinahanglan ipaagi tanan sa due process. – IBM BANAT NEWS