Nangulata gipusil patay

CEBU, Philippines — Gipusil patay ang usa ka 24-anyos nga lalake nga giingong badlungon sa ilang lugar diha sa Sanciangko Street, Barangay Pahina Central, siyudad sa Sugbo pasado alas-4 kagahapon sa kaadlawon.

Ang biktima mao si Johnrey Belarmino, residente sa Sitio Taytayan, Barangay Pahina Central ning siyudad.

Nagkanayon si Police Major Philip John Libres, hepe sa Carbon Police Station 5 sa Cebu City Police Office nga personal nga away ang gisubay nila nga motibo sa krimen sanglit sa miaging adlaw giingong adunay gikulata ang biktima.

Sigon sab ni Libres nga badlungon sa lugar ang biktima kay magmaoy  ug kalit lang kini manumbag o mangulata.

Giingong duna kini warrant of arrest sa kasong frustrated murder ug duna say laing kaso sa pagpamusil ug gipaabot nalang ang warrant batok niini.

Hinuon, duna nay persons of interest ang kapulisan nga ilang gituohang taga didto ra sab kay base sa CCTV footage nga ilang nakuha wala may tawong nigawas sa karsada human sa pagpamusil. --  IBM BANAT NEWS