162 langyaw gi-inquest

CEBU, Philippines — Gipaubos sa inquest proceedings kagahapong adlawa ang 169 ka mga langyaw nga nasakpang nagpadagan sa Philippine Overseas Gaming Operation (POGO) diha sa Tourist Garden Hotel and Restaurant sa Brgy. Agus, Lapu-Lapu City nga gironda niadtong adlaw nga Domingo.

Ang mga langyaw naglakip sa 93 ka Chinese; 69 ka Indonesians; usa ka Malaysian ug unom ka Burmese (taga Myanmar).

Samtang ang pito ka mga Pilipinong giingong administrador sa operasyon kasohan og paglapas sa Republic Act 9208 o Anti-Trafficking in Persons Act of 2003.

Matud pa ang Bureau of Immigration mao ang lead agency sa pagpasaka sa kaso, ini og human sa kaso ang Presidential Anti-Organized Crime Commission maoy mokustodiya kanila didto sa kaulohan. Ang mga ahensiya mokuha sab og cyber warrant aron masusi ang suds a mga nasakmit nga computers ug mga gadgets sama sa mobile phones ug uban pa nga giingong gigamit sa "love scams" ug cryptocurrency fraud

Sa pikas bahin, si Kapitan Jim Boy Igot sa Barangay Agus sa Dakbayan sa Lapu-Lapu nipadayag nga wala silay kasayuran ug wala sila nakabantay nga dunay Philippine Offshore Gaming Operator diha sa Tourist Garden Hotel and Restaurant nga dili layo sa ilang barangay hall. Sumala pa ni Igot, dili makita gikan sa gawas kun unsay nanghitabo sa sud kay sirado ang gate ug taas ang koral sa maong compound.

Giangkon ni Igot nga walay ni-apply kanila og clearance sa ilang operasyon maong wala silay kasayuran sa ilang gipanghimo sa sulod.

Si Mayor Junard Chan mipasira na niini human sa maong raid.

Samtang si acting  Mandaue City mayor Glenn Bercede mimando sa pagpainspeksyon sa mga establisamento sa siyudad aron pagsusi kun aduna bay POGO  sa siyudad.

Si Atty. August Lizer Malate, pangulo sa Business Permit and Licensing Office (BPLO) miingon nga bisan sa ilang pisikal nga inspeksyon sa mga establisamento, kinahanglan gihapon nila ang tabang sa publiko.—Jonnavie Villa ug report nilang Romeo Limpangog/IBM BANAT NEWS