CEBU, Philippines — Gipaslak sa prisohan sa Mabolo Police Station sa Cebu City Police Office (CCPO) ang duha ka mga lalake nga gikatahong nagsumbagay sa dalan sa Back APM, Barangay Mabolo, siyudad sa Sugbo atol sa disko tungod sa ilang pista.
Ang mga nadakpan mao sila si alyas Felix, 27 anyos ug si alyas Lear, 36 anyos pulos residente sa naasoy nga lugar.
Gidakop ang duha tungod sa kaguliyang nga ilang nahimo tungod sa ilang pagsinumbagay.
Apan si alyas Felix mipasangil nga si alyas Lear ug iyahang amahan maoy dunay bangi gumikan sa suyaay, apan sila nga mga anak wala mag apil-apil.
Gani dihang nag-abot sila sa fiesta nitagad siya, nitimbaya og happy fiesta gani iyaha pang giagbayan. Apan wala matud pa nitagad sa iyaha si alyas Lear nga iyaha ra sad gibalewala.
Dihang nahuman sila og disco gisukmatan ni alyas Felix si alyas Lear kung nganong wala siya tagda ug unsay sala niya apan niresulta na hinuon kini sa ilang panaglalis.
Nasayran nga parehong nakainom ang duha maong nagkainitay og estorya ug nisangpot sa sinumbagay.
Si alyas Felix nakaangkon og samad sa may suwang ug kamot kay gihapak matod pa siya ug botelya pero dili niya matudlo kung kinsa ang naghimo kay wala niya maklaro. Kasong alarm ang scandal ang ipasaka sa kapolisan batok sa duha. -- IBM BANAT NEWS