CEBU, Philippines — Tinguha ni Senate Majority Leader Senator Francis "Tol" Tolentino, nga dili una ipatuman ang memorandum sa Land Transportation Office Central Visayas nga dakpon na ang mga motor nga way plaka sugod sa Septiyembre1, 2024.
Matud pa ni Tolentino, kinsa nibisita sa Dakbayan sa Sugbo aron pagtambong sa Pasigarbo sa Sugbo nga angayan usa paaboton ang luwatan nga balaod ni President Ferdinand "Bongbong" Marcos Jr nga usa ka plaka nalang ang gamiton.
Nagplano si Tolentino sa pagpadala og sulat ngadto sa buhatan ni Department of Transportation Secretary Jaime Bautista karong adlawa kabahin sa maong tinguha.
Suma pa niya nga sayod siya nga daghan kaayong backlog sa mga plaka ang LTO hinungdan nga dili sala sa mga nanag-iya ug motor nga wala pa ang ilang plaka ug dili sila angayan nga dakpon.
Ang senador nibutyag dako iyang kahibulong nganung mag-una ang rehiyon 7 sa pagpatuman sa maong Memorandum Circular nga mosugod na sila sa pagpanakop sa September 1 nga sila mismo wala may ikahatag nga plaka hinungdan nga migamit na lang og mga improvised plate number ang mga tag-iya og motor aron adunay magamit.
Ang senador nibutyag nga dili sala sa mga nanag-iya ug motor nga wala silay plaka kay sila mismo ang namayad na sa ilang mga motor aron adunay magamit pero walay plaka nga ikahatag ang LTO.
Una niini gipahibawo sa LTO-7 nga magsugod na sa pagpanakop karong September 1 sa mga motorista nga wala motuman sa bag-ong lagda may kalabutan sa pagamit sa improvised ug temporary nga mga plaka.
Kini human ang ahensya mopatuman sa LTO Memorandum Circular No. VDM-2024-2721 ni LTO Chief Assistant Secretary Atty. Vigor Mendoza II. (BANAT NEWS)