Kaso sa dengue sa Mandaue nisaka
CEBU, Philippines — Naalarma karon ang mga tinugyanan sa panglawas sa Siyudad sa Mandaue nunot sa pagsaka sa mga kaso sa sakit nga dengue sa siyudad.
Si Dr. Debra Maria Catulong, City Health Officer mipahibalo nga aduna nay natala nga nakalas sa maong sakit dili palang dugay.
Ang namatay usa ka tuig pa nga bata, mao kini ang ikaduha nga nakalas tungod sa dengue sa naasoy’ng siyudad, ang una nakalas natala niadtong Hunyo, 2024.
Matud pa ni Catulong moabot na og 419 ka mga dengue cases ang natala sukad niadtong Enero hangtod ning kasamtangang buwan sa Agosto sa siyudad.
Giingong nabantayan ang pagsaka sa mga kaso sud palang sa nakalabay nga duha ka semana ug mga barangay nga adunay daghang kaso mao ang Brgy. Tabok, Paknaan, Canduman, Tipolo ug Looc.
Gihingusgan karon sa City Health Department ang kampanya batok dengue diin usa niini mao ang subling pag activate sa dengue brigades sa 27 ka mga barangay.
Giawhag usab ang mga molupyo nga manglimpiyo sa palibot ug pagsiguro nga walay napundong mga tubig nga posible itlogan sa mga lamok nga nagdala og sakit nga dengue. (BANAT NEWS)
- Latest
