Programa sa DOLE pagtabang sa mga trabahante malamposon
CEBU , Philippines — Ang Department of Labor and Employment (DOLE-7), sa kinatibuk-an nakahatag og P35.3 milyones ngadto sa 1,196 ka mga trabahante pinaagi sa Single Entry Approach (SEnA) program sa Hulyo 2024.
Ang SEnA usa ka administratibong pamaagi nga naghatag og paspas, walay gidapigan, barato, ug accessible nga settlement procedure sa tanang labor ug employment issues pinaagi sa 30 ka adlaw nga mandatory conciliation-mediation.
Gikan sa Enero hangtud sa Hulyo 2024, ang DOLE-7 naglihok sa 1,508 ka mga request for assistance (RFAs). Diin 1,494 ka RFAs ang na-dispose, nga miresulta sa taas nga disposition rate nga moabot sa 99.93%. Kini nagpasabut nga halos tanan nga mga hangyo natubag sa ahensya.
Sa probinsya sa Sugbo ug mga Tri-Cities: Cebu City, Mandaue, ug Lapulapu, ang yunit sa SEnA nakadumala og 1,216 ka RFAs ug malampusong nakasulbad sa 1,169 niini, nga nakab-ot ang settlement rate nga 96.53%. Kini misangpot sa P28.8 milyones nga gihatag ngadto sa 916 ka mga trabahante.
Sa Negros Oriental, 192 ka RFAs ang nadawat diin 162 niini ang nasulbad nga miresulta sa 88.04 porsyento nga settlement rate ug P4.9 milyones nga gihatag ngadto sa 172 ka mga trabahante.
Samtang sa Bohol, adunay 66 ka RFAs ang nadawat ug 53 niini ang nasulbad o katumbas sa 86.36 porsyento. Kini miresulta sa P986,541.78 nga nahatag ngadto sa 77 ka mga trabahante.
Sa Siquijor, sa 29 ka RFAs, 35 o 85.29 porsyento ang nasulbad, nga nakabenepisyo sa 31 ka mga trabahante nga adunay PHP 504,886.41 nga monetary awards. Suma pa ni DOLE-7 Regional Director Lilia A. Estillore nga ang gisulbad nga RFAs nagtumong sa mga resolusyon nga makatubag sa mga panginahanglan sa duha ka partido nga nalambigit nga wala magkinahanglan og mga abogado o bayranan.
Nanghinaot siya nga ubos sa programa mas daghan pa nga kustomer ang ilang matabangan nga adunay problema kabahin sa ilang trabaho. Giawhag usab niya ang tanang apektadong partido sa trabahoan sa pag-apil niini nga programa. (BANAT NEWS)
- Latest
