Duha patay sa pagpamusil

CEBU, Philippines —  Duha ang patay sa nahitabong pagpamusil sa managlahi nga Barangay sa Siyudad sa Sugbo niadtong Biyernes sa gabii ug Sabado sa kaadlawon, nadugang kini sa talaan sa mga nabiktima sa upat ka mga kaso sa pagpamusil sud lang sa duha ka semana ning buwana.

Natusak-tusak sa bala ang lawas sa biktimang giila lang sa pangalang Pikoy human kini gipusil diha sa iyang gihigdaang aseras sa Pier 2, sa Barangay San Roque, siyudad sa Sugbo kagahapon sa alas 12 sa tungang gabii.

Ang biktima giingong kargado sa pantalan apan giingong nalambigit kini sa pagpamaligya og illegal nga drugas diha sa maong pantalan.

Ang Police Station 3 sa Cebu City Police Office (CCPO) pinangulohan sa ilang Hepe nga si Police Mayor John Lynbert Yango miingon nga wala na diha sa crime scene ang biktima sa ilang pag-abot kay gidala na kini sa ambulansiya sa Barangay San Roque padung sa Cebu City Medical Center diin kini gideklarar nga dead on arrival.

Gikataho nga nakaangkon kini og unom ka samad pinusilan sa nagkadaiyang parte sa lawas. Sa inisyal nga imbestigasyon sa kapulisan ang biktima giingong nalambigit sa pagpamaligya og illegal nga drugas.

Giingong duha ka mga wala mailhing lalaki ang niduol sa biktima ug gipusil kini samtang natulog sa aseras.

Unom ka basiyo ug duha ka slugs sa bala sa kalibre .45 nga armas ang nakuha sa crime scene.

 Nakuha sab gikan sa iyang bulsa ang siyam ka basiyo sa gidudahang pakete sa shabu ug laing 36 ka gagmay'ng pakete nga gituohang shabu ug kwarta nga P758 nga gituohang halin sa drugas.

"Drug related,  naay na-recover nga 36 small sachet nga shabu. Nag conduct pa mi’g backtracking of CCTVs as of now," sigon ni Yango.

Samtang patay sab ang 41-anyos nga lalake human kini gipusil diha sa Sitio All Season 3, Barangay Cogon Pardo ning siyudad, pasado alas-8 sa gabii sa adlaw'ng Biyernes.

Ang biktima mao si Nestor Abellanosa Tabacon Jr., driver, residente sa naasoy nga dapit.

Sa inisyal nga imbestigasyon sa Police Station 7 sa Cebu City Police Office gibutyag sa asawa sa biktima nga nakaila sila sa mamumuno kinsa gikatahong nagpabuto og armas sa makadaghang higayon diha sa ilang dapit sa wala pa niini gipusil ang biktima.

Nibalik sa dapit ang suspek ug didto na niya gipusil ang bitkima nga naigo sa nagkadaiyang parte sa iyang lawas.

Daling misibat ang suspek human sa krimen ug na recover sa otoridad ang tulo ka kabhang sa wala pa matino nga kalibre sa bala. (BANAT NEWS)