Garcia makigtigom sa SFI pagpangandam sa Sinulog 2025

CEBU, Philippines — Si Acting Cebu City Mayor Raymond Alvin Garcia nibutyag nga unang semana sa Septiyembre moptawag na siya ug tigom sa Sinulog Foundation Incorporated alang sa pagpangandam sa Sinulog 2025.

Matud ni Garcia nga gipahibalo niya daan nga ang venue alang sa Sinulog 2025 gumikan kay hapit na mapupos ang suspension ni Mayor Michael Rama ug mabalik na kini sa Nobiyembre 10, 2024.

Si Garcia nagkanayon nga atol sa pagbalik ni Rama gamay nalang kaayo ang preparasyon ug daghan pa ang mga holiday mao nga kinahanglang sunod buwan mopatawag na siya og mga tigom.

Si Garcia nagkanayon nga depende na kang Rama kong aprobahan niini ang mga plano nga mogawas atol sa ilang tigom uban sa SFI sa pagbalik niini sa buwan sa Nobiyembre.

Dugang ni Garcia nga nagtuo siya nga bisan og anaa na ang BRT Project magmalampuson gihapon ang ipahigayon nga Sinulog grand parade diha sa Cebu City Sports Center sa sunod tuig. —BDB BANAT NEWS