CEBU, Philippines — Naangol ang suspetsadong drug pusher human nakigpinusilay sa mga polis kagahapon sa kadlawon diha sa Purok Orange, Barangay Lawaan 3, Dakbayan sa Talisay.
Ang suspetsado usa ka 23-anyos nga taga Sitio Moalave, Barangay Tabunok sa maong siyudad.
Ang hepe sa Talisay City Police Station Police Lieutenant Colonel Epraem Paguyod nibutyag nga naghitak na ang operasyon sa ilegal nga drugas diha sa nahisgutang dapit.
Hinungdan nga nipahigayon sila og operasyon batok sa suspetsado apan giingong parehong nakugang ang matag habig ug nipabuto sa armas ang suspetsado.
Ang kapolisan nibawos kini og pabuto ug naigo sa tuo nga bukton ang suspetsado hangtud nga na-neutralize kini ug nasikop. Ang suspetsado gidala kini sa mga polis ngadto sa tambalanan ug nasakmit gikan kaniya ang usa ka .45 kalibre nga pistola, usa ka magazine nga adunay duha ka buhing bala ug naka-recover usab sa kapolisan og duha ka kabhang sa bala.
Gawas niini, nasakmit usab sa Talisay City Drug Enforcement Unit gikan sa suspetsado ang shabu nga nitimbang ngadto sa 15.25 gramos ug nibalor tanan ngadto sa 104 mil.
Ang suspetsado gikatakda nga pasakaan og tukmang kaso sa nahimo niya nga kalapasan. (BANAT NEWS)