CEBU, Philippines — Tumong sa City Office for Substance Abuse Prevention (COSAP) nga modeklara og dul-an sa 50 ka barangay sa Dakbayan sa Sugbo nga mahimong “drug cleared” sa dili pa matapos ang tuig.
Nanghinaot si COSAP Executive Director Jonah John Rodriguez nga makakita og dugang drug cleared barangays aron mas mapalig-on pa ang kampaniya batok sa paggamit sa ilegal nga drugas dinhi sa siyudad.
Sa 80 ka barangay sa siyudad, 33 niini ang gi-deklara nga drug cleared niadtong buwan sa Hulyo karong tuiga.
Gilangkuban kini sa San Jose, Cambinocot, Kasambagan, Zapatera, Budlaan, Kamagayan, Agsungot, Binaliw, Tabunan, Punta Princesa, Kalubihan, Adlaon, Basak Pardo, Buot Taup, Kinasang-an, Lusaran, San Antonio, Pamutan, Parian, Sudlon 1, Sudlon 2, Toong, Sto. Niño, Sapangdaku, Sinsin, Bacayan, Guba, Malubog, Pit-os, Paril, Mabini, Lusaran, ug Taptap.
Matud ni Rodriguez nga gisugdan na sa Regional Oversight Committee on Barangay Drug Clearing (ROCBDC) ang assessment sa unom ka barangay sa siyudad nga ni-apply alang sa drug cleared status.
Ang unom ka barangay nga wala una gihinganlan ni Rodriguez kinahanglan pa nga motuman sa pipila ka mga rekisitos nga gipangayo sa ROCBDC isip kabahin sa ilang assessment.
Apan giklaro ni Rodriguez nga bisan og gihatagan og “drug cleared” status ang usa ka barangay wala kini magpasabot nga nawagtang na ang kalihokan sa ilegal nga drugas niini.
Ang usa ka barangay nga gikonsidera nga drug cleared kong ang tanang giila nga drug personalities sa watchlist adunay dokumento, nahatagan og general interventions ug niagi sa drug rehabilitation.
Ang drug cleared barangay nga mapakyas sa pagtuman sa maong mga rekisitos matangtangan sa maong status niini ug kinahanglang magsugod na sa sinugdanan sa pagsumiter og resikitos ngadto sa ROCBDC.
Kasamtangang mohatag ang kagamhanan sa siyudad og P100,000 cash incentive sa mga drug cleared barangays.
Subay niini, laing 19 ka barangay sa Central Visayas ang nadugang sa listahan sa mga drug cleared barangay.
Sa maong ihap, 12 niini gikan sa Bohol, upat sa Negros Oriental ug 3 sa Cebu. (BANAT NEWS)