Duha patay sa pagpamusil, pro-7 naalarma

CEBU, Philippines — Giangkon karon sa Police Regional Office(PRO)-7 nga naalarma na sila aning sagunson nga mga insidente sa pagpamusil sa Cebu City ugsa ubang bahin sa Central Visayas ug gimando nga palawman ang mga imbestigasyon.

Kini human lain na sab mga insidente sa pagpamusil ang natala kagahapon sa kaadlawon nga nikalas og duha ka kinabuhi.

Patay diha-diha dayon ang usa ka 34-anyos nga lalake human gipusil samtang kini natulog sulod sa iyang balay sa Sitio Kahuyan Alaska, Barangay Mambaling, sa Dakbayan sa Sugbo kagahapon sa kaadlawon, Agosto 22, 2024.

Ang biktima mao si Gilbert Salcedo Gelbolingo, 34, usa ka ex-convict ug residente sa naasoy nga lugar ug gradwado sa kursong criminology sa usa ka unibersidad sa dakbayan sa Sugbo.

Nakadungog ang uyoan sa biktima og duha ka buto sa armas maong milili siya sa gipuy-an sa biktima ug nakita niya ang usa ka wala mailhing tawong nag-shorts ug sweatshirts nga nagdali og gawas.  Ang iyang pag-umangkon nakaangkon og samad pinusilan sa agtang ug sa ubang parte sa lawas.

Ang Mambaling Police Station sa ilang bahin nakakuha og impormasyon nga giingong dako og utang sa ilegal nga drugas ang biktima.Nangita sila karon og mga kopya sa mga CCTV footages diha sa lugar sa pamasin nga mailhan ang mga mamumuno.

Samtang patay sab ang usa ka 31 anyos nga lalakeng naglingkod sa iyang motorsiklo dihang kini gipusil og riding in tandem diha sa Purok Sambag Centro, Barangay San Vicente, Lungsod sa Liloan kagahapon sa buntag.

Ang biktima mao si Bryan Angtud Rivera, 31, nagpuyo sa Purok Banica, Sitio Sambag sa maong barangay.  Sa imbestigasyon sa Liloan Police Station gipusil kini unom ka higayon gamit ang kalibre 45 nga armas. Kalambigitan sa illegal nga drugas gihapon ang gisubay sa kapulisan nga motibo sa maong pagpamusil.

Ang PRO-7 naalarma na niining mga pagpamuil. una niini, upat ka shooting incidents ning semanaha ang natala sa Siyudad sa Sugbo nga nahitabo sa Barangay Mambaling, Poblacion Pardo ug Sambag 1 ug ning bag-o sa Liloan.

Matud ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga giimbestigaran na ang maong shooting incidents ug mopasaka sila og kaso batok sa mga tawo nga resposable sa krimen.

“In a sense we are alarmed by these shooting incidents  because I think yesterday three shooting incidents, we cannot just let this pass, we will investigate thoroughly, make sure that the perpetrators are jailed, ang atong Regional Director Police Brigadier General Anthony Aberin naghatag og specific kay nga instruction not only in cebu City but in all areas with shooting incidents to make sure that justice is achieve in this cases and to prevent this shooting incidents from happening again,” sigon ni Pelare.

Hinuon, base sa mga imbestigasyon sa kapulisan sagad sa mga shooting incidents ang motibo may kalambigitan sa ilegal nga drugas. Ang mga biktima nakadispalko o kaha dunay dakong utang sa ilegal nga drugas ngadto sa usa ka drug personality.  (BANAT NEWS)