Garcia dili mahadlok masuspenso

CEBU, Philippines — Wala mahadlok si gobernadora Gwendolyn Garcia sa bisa’g unsa nga hulga sa suspension ug di mapugngan ang iyang pagpanalipod sa katungod sa mga Sugboanon.

Atol sa iyang State of the Province Address (SOPA) niadtong Agosto 20, si Garcia nagkanayon nga sa dihang iyang nasayran nga makaguba sa “cultural integrity” sa Cebu Provincial Capitol building ang Cebu Bus Rapid Transit (CBRT) diha sa may Osmeña boulevard dali niyang gipahunong ang maong pagtrabaho human nga nasayran nga wala mananghid ang kontraktor ngadto sa National Historical Commission of the Philippines (NHCP).

Ang maong aksyon ni Garcia maoy hinungdan nga gireklamo sa suspended Cebu City Mayor Michael Rama ang gobernador ngadto sa buhatan sa presidente tungod sa pag-apil apil sa gobernadora sa proyekto sa dabkayan sa Sugbo.

Apan sumala usab ni Garcia gibasura sa buhatan sa presidente ang hangyo sa mayor nga siya isuspenso samtang padayon ang gihimong imbestigasyon kalabot sa reklamo.

“Be that as it may, dear someone, no threat of suspension of this governor will stop me from demanding what is due the Cebuanos under the law and as our cultural heritage” matud ni Garcia.

Ang buhatan sa presidente mibasura sa maong hangyo ni Rama tungod sa kakulang sa merito niini. (BANAT NEWS)