Garcia mikwestyon nganong wa pa mauli ang pulpit panels

CEBU, Philippines — Nagsugod na og kwestyon si Gobernador Gwendolyn Garcia kon tinuod ba ang pamahayag sa National Museum of the Philippines (NMP) kalabot sa pag-uli niini sa upat ka pulpit panels ngadto sa Nuestra Señora de Patrocinio de Maria Parish sa lungsod sa Boljoon.

Atol sa iyang State of the Province Address (SOPA) niadtong Agosto 20, si Garcia nakahisgot nga hangtud karon wala pa gihapon mauli ang upat ka pulpit panel ngadto sa simbahan sa Boljoon, sobra tulo ka bulan human nipahibalo ang NMP nga ila kining ibalik sa Sugbo.

“It’s been over three months, I wonder if that statement was true.

At any rate, we do hope they will stand by their word that these panels be returned to the Patrocinio de Maria Santisima Church, considered a national cultural treasure” matud ni Garcia.

Mayo karong tuiga sa dihang si Andoni Aboitiz, Chairperson sa Board of Trustees sa NMP misulat sa gobernadora pagpahibalo nga iuli na sa museum ang maong mga religious artifact. Apan sa maong sulat, walay detalye kon kanus-a gyud kini ibalik.

Matud ni Garcia nga ang maong mga pulpit panels wala pa ma “deconsecrate”, pasabot kadtong ilegal nga naggunit niini nakaangkon og sakrelihiyo.

“Every day for those who possess these panels would constitute a sacrilegious offense. It’s been months and so the sacrilegious offenses are piling up.” matod ni Garcia.

Si Garcia maoy usa sa mga nisulat paghangyo sa NMP nga ibalik ang 19th century nga panels ngadto sa Archdiocesan Shrine of Patrocinio de Maria Santisima human kini giingong gikawat niadtong 1980s.

Pipila ka tuig ang nilabay, nahibaw-an nga gidonar sa mga pribadong indibidwal ang maong mga religious artifacts ngadto sa NMP. (BANAT NEWS)